Matheus

25 Tan, tas raych khan mit tseen letiche meet ferklaycht wëre woo sayn lampe kehool hon un sin te praut man iim keeche kang. 2 Finef fon tëne waare tume un finef waare foersichtich. 3 Ti tume hon iire lampe kehool, awer hon khee eel mit kenom 4 awer ti foersichtiche hon eel flaxe mit iire lampe mit kenom. 5 Wayl te praut man lang ketauert hot, al tii hon xloof kriit un sin in kexloof. 6 Awer in te mite fon te nacht, hon se yemant am xraaye keheert: ‘Te prautman is too! Keet tëm trefe.’ 7 Al ti yungfraae sin tan uf kextii un hon sayn lampe in ortnung kextelt. 8 Ti tume hon fer ti foersichtiche kesaat: ‘Kept uns een pisye fon ayre eel, wayl unser lampe sin neekst am aus keen.’ 9 Ti foersichtiche hon keantwort: ‘Im xtant kepts net kenuuch fer uns un fer aych. Keet pis tii woo eel ferkhaafe un khaaft een pisye fer aych.’ 10 In te tsayt woo se eel khaafe kang sin, is te prautman khom. Ti yungfraae woo fërtich waare, sin mit tëm in te hoochtsayt fest rin kang un ti teer is tsu kemacht kep. 11 Nochter sin aach ti anere letiche meet khom, un hon kesaat: ‵Hër, hër, mach fer uns uf!‵ 12 Tee hot keantwort: ‘Ich saan aych ti woerheet: Ich khëne aych net.’ 13 “Tes weeche, playpt wachsam, wayl teyer wist net te taach orer ti xtun. 14 Wayl is wii een man, woo eep eyer faart kerees is, hot sayne sklaawe keruuft un hot sayn raychtum fer tëne iwer kep un fertrau. 15 Tsu eene hot eyer finef talënte kep, tsu te aner tswaay un tsu noch een aner een, tëm noo yeete eene sayn kapasiteet, tan is eyer faart kereest. 16 Tee woo finef talënte kriit hot is klaych kexefte mim kelt mache kang, un hot noch finef fertiint. 17 In ti selwich aat, tee woo tswaay kriit hot, hot noch tswaay fertiint. 18 Awer te sklaaw woo ploos eene kriit hot, is faart kang, hot een loch im pootem kekraapt un hot tas kelt fon sayn hër ferxtekelt. 19 “Noo een lang tsayt, is te hër fon te sklaawe tsurik khom un hot aprechnunge mit tëne kemacht. 20 Tee woo 5 talënte kriit hat, is tsu tëm khom un hot noch 5 talënte keprung. Tee hot kesaat: ‘Tuu host mich 5 talënte kep. Kuk mool, ich hon noch 5 talënte fertiint!’ 21 Sayn hër hot tëm kesaat: ‘Aarich kuut, tuu, kuute un troye sklaaw! Tuu waarst troy wiis tuu weeniche tinge uf kephast host. Tes weeche, tuun ich tich fiile tinge iwer kepe. Khom un fray tich mit tayn hër.’ 22 Un too is foer khom tee woo ti 2 talënte kriit hat, un tee hot kesaat: ‘Hër, tuu host mich 2 talënte kep un, kuk mool, ich hon noch 2 talënte fertiint!’ 23 Sayn hër hot tëm kesaat: ‘Aarich kuut, tuu, kuute un troye sklaaw! Tuu waarst troy wiis tuu weeniche tinge uf kephast host. Tes weeche, tuun ich tich fiile tinge iwer kepe. Khom un fray tich mit tayn hër.’ 24 “Tsum xlus, is te sklaaw woo 1 talënt kriit hot foer khom un tee hot kesaat: ‘Ich wust tas tuu een xtrenge man pist un tas tuu ërnte tuust was tuu net keseet host un samer refst was tuu net ketrox host. 25 Tes weeche hon ich pang kriit un sin tayn talënt im pootem ferxtekele kang. Hiir is was tayn is‵. 26 Te hër hot tëm keantwort: ‘Tuu xlecht un faule sklaaw! Tan wust tuu tas ich ërnte tuun was ich net keseet hon un samer refe was ich net ketrox hon? 27 Tan, tuu hëst mise mayn kelt fer ti pank mëner kep han, un, wën ich tsurik khemt, hët ich tas mit tsinse kriit 28 Tes weeche, hoolt tëm te talënt weech, un kept fer tee woo tseen talënte hot. 29 Wayl fer al tee woo hot, mee wërt fer tëm kep, un tee wërt aarich fiil hon. Awer tee woo niks hot, soo kaar was tee hot, wërt tëm wech kehool. 30 Xmayst te sklaaw raus tsus in tunkelheet. Tat wërt tee prile un sayn tseen wëre knerste. 31 “Wën te Mënxe Soon in sayn hërlichkheet khomt, un ale engele mit tëm, tan tuut eyer sich uf sayn hërlich troon setse. 32 Ale natsyoone wëre foer tëm kesamelt, un eyer tuut ti mënxe aus naner teele, soo wii te xeefer ti xeef fon te kaprite aus naner teelt. 33 Un eyer tuut ti xeef uf sayn rechts sayt, awer ti kaprite uf sayn links sayt. 34 “Tan, tuut te Kheenich fer tii uf sayn rechts sayt saan: ‘Khomt iir al, woo mayn Fater keseechent hot, ërpt tas Raych woo fer aych foer perayt is fom aanfang fon te welt aan. 35 Wayl ich hat hunger, un teyer hot mich was tsum ese kep. Ich hat torst, un teyer hot mich was tsum trinke kep. Ich waar een frëmte, un teyer hot mich liiplich aan kenom. 36 Ich waar nakich, un teyer hot mich aan ketsoo. Ich waar krank, un teyer hot mich uf kephast. Ich waar in te katee, un teyer sayt mich pesuuche khom.’ 37 Tan, ti kerechter tuun tëm antworte: ‘Hër, wanee hon mer tich mit hunger kesiin un tich was tsum ese kep, orer mit torst kesiin un tich was tsum trinke kep? 38 Wanee hon mer tich wii frëmte kesiin un tich liiplich aan kenom, orer nakich kesiin un tich aan ketsoo? 39 Wanee hon mer tich krank orer in te katee kesiin un tich sin pesuuche khom?’ 40 Un te Kheenich tuut tëne soo antworte: ‘Ich saan aych mit kans sicherheet: was teyer tsu eene fon te kleenste fon mayn priiter kemacht hot, hot teyer tas tsu mich kemacht.’ 46 Tii tuun tsu ti eewich fernichtung keen; awer ti kerechte tuun tsum eewiche leepe keen.”