Yoohan
2 Am 3te taach, is een hoochtsayt in Kanaa fon Kalileya pasiirt un Yeesus sayn mama waar tat. 2 Yeesus un sayn tisipele waare aach tsu te hoochtsayt in kelaat. 3 Wii te wayn al kep is, hot Yeesus sayn mama tëm kesaat: “Tii hon khee mee wayn.” 4 Awer Yeesus hot keantwort: “Fraa, was hot tas mit uns se tuun? Mayn xtun is noch net khom.” 5 Sayn mama hot tan fer ti tiiner kesaat: “Macht ales was eyer aych xikt.” 6 Es waare tat 6 waser kruuche aus xteen kewees fer ti yuute sich rayn mache tëm noo sayn reekele. In yeete kruuch, hon 2 orer 3 moos waser rin kephast. 7 Yeesus hot se kesaat: “Filt ti kruuche mit waser.” Un tii hon se pis aan te rant kefilt. 8 Tan hot eyer se kesaat: “Xept een pisye un nëmt tas fer te man woo tas fest uf phast.” Un tii hon tas kemacht. 9 Tee woo tas fest uf kephast hot, hot tas waser kexmekt, woo tsu wayn kemacht kep is. Anerste wii ti tiiner woo tas waser keprung hon, wust eyer net fon woo tas heyer khom is. Tes weeche hot eyer te prautikam keruuft 10 un hot tëm kesaat: “Al tuun eyerst te kuute wayn petiine un tan, wën ti layt xon pesof sin, te wayn woo net soo kuut is. Awer pis yets, hast tuu te kuute wayn tsurik kehal.” 11 Tas was Yeesus in Kanaa fon Kalileya kemacht hot, waar te eyerste fon sayn wunere. Soo hot eyer sayn hërlichkheet ketsaycht un sayn tisipele hon aan tëm keklaapt. 12 Noo heyer, sin Yeesus, sayn mama, sayn priiter un sayn tisipele pis Kafarnaum runer kang, awer tii sin weeniche taache tat keplip. 13 Tas Oostre Fest fon te yuute waar xon ticht un Yeesus is tsu Yeruusalem ruf kang. 14 Im thempel, hot eyer ti layt ketrof woo rints fii, xeef un taupe ferkhaaft hon. Tat waare aach kesitst tii woo kelt kehantelt hon. 15 Yeesus hot een paytx aus xtrike kemacht un hot se al fom thempel faart kexikt, tepay mit sayn xeef un rints fii. Eyer hot ti nikele fon tëne woo kelt kehantelt hon ufm pootem kexmis un hot tëne sayn tix um kexmis. 16 Tee hot aach kesaat fer tii woo taupe ferkhaaft hon: “Nëmt tas ales wech! Lost mool noo tas haus fon mayn Fater tsu een kexeft plats mache!” 17 Sayn tisipele hon sich traan ketenkt was kexrip xteet: “Ti liip woo ich noo tayn haus xpiire, tuut in mich prëne.” 18 Tes weeche hon ti yuute tëm kefroot: “Was fer tsayche khanst tuu uns kepe fer se pewayse tas tuu tas recht host fer tas ales mache?” 19 “Rayst tiise thempel ap — hot Yeesus keantwort — un in 3 taache tuun ich tëm noch mool uf paue.” 20 Too hon ti yuute kesaat: “Es hot 46 yoore ketauert fer tiise thempel paue un tuu wilst tas in 3 taache mache?” 21 Awer te “thempel” woo tee am xpreche waar, waar sayn khërper. 22 Xpeeter, wii Yeesus fom toot uf keruuft kep is, hon ti tisipele sich traan ketenkt tas eyer es ofts kesaat hat un tii hon aan te Xrifte un aan Yeesus sayn wërter keklaapt. 23 Wii eyer in Yeruusalem torich tas Oostre Fest waar, hon fiile aan kefang uf tëm klaape wii se al sayn wunere kesiin hon. 24 Awer Yeesus hot net kans uf tëne ketraut, wayl eyer hot se al kuut kekhënt. 25 Nimant praycht tëm aus leye wii ti mënxe sin, wayl tee wust wii se inerlich waare.