1te Timoteus

6 Mit sicherheet, wën yemant fer Kot tiine tuut, un is froo mit was er hot, tuut tas fiil nutse pringe. 7 Wayl meyer hon niks uf te welt keprung, un meyer khene aach niks faart nëme. 8 Soo, wën meyer tsum ese un tsum aan tsiie hon, sin mer too temit tsufriite. 9 Awer tii woo raych wëre wole, fale in fersuuchung, in lase un in fiil unferninftiche winxe woo xaate tuun, woo mache tas ti mënxe in fernichtung un ruiine fale. 10 Wayl ti liip tsum kelt is te wortsel fon ale sorte xlechte tinge, un etliche, woo sich noo tiise liip aan kextrengt hon, sin fom klaape ap kelenkt kep un hon fiil xmërts iwich sich selepst keprung. 11 Awer, xtrëng tich aan noo ti kerechtichkheet, ti leaaliteet tsu Kot, te klaape, ti liip, ti persewerans un ti tsaamheet. 12 Khëmpf te kuut khampf fon klaape; ... 13 Foer Kot sayn aue, woo ales lepeentich halt, un foer Kristus Yeesus, woo wii een tsayer, sayn xeen aus leyung foer Pontsyus Pilatus kemacht hot, tuun ich tich xike 14 tas tuu tas kepoot kenau in halst, oone flëke un in een kexayt aat, pis te Hër Yeesus tsum foer xayn keprung wërt, 15 torich te frooe un eensich Mëchtiche Hër in te pextimt tsayt too tefoer. Tee is te Kheenich fon tëne woo wii kheeniche rechiire un Hër fon tëne woo wii hëre rechiire, 16 te eensiche woo imortaliteet hot, woo im licht woont, woo ma nët hiin khomt, tee woo khee mënx kesiin hot un nët siin khan. Fer tee sole ti eere un ti eewich macht këp wëre. Amen. 17 Kep tiise aanreete fer tii woo raych in tiise welt sin: tas se net hoochmuutich wëre un tas se net sayn hofnung uf unsichere raychtum leye, awer uf Kot, woo uns raychlich pesoricht mit ales woo uns tsufriit lost. 18 Saa tëne tas se tas kuute mache sole, tas se flaysich fiil kuute tinge mache, tas se fraywilich kepe, tas se sole wilich fer se teele sin, 19 un soo, samle sich een xats, eene kuute funtamënt fer ti tsukhunft; wën se tas mache, tuun se sich aan tas woere leepe fest hale. 20 Timoteus, phas uf was tich fertraut waar. Hal tich wech fon te unutsliche kexpreeche woo ferfluuche was haylich is un fon te aanunge woo net xtime, woo fon te falx keruuft “khëntnis” khome.