Hepreeyer
5 Wayl yeete hooche priister woo tswixich ti mënxe raus kesuucht këp is, is fer tëne iire nuts in kesëtst këp, fer tas tings iwer Kot uf phase, fer kexënke un opfere weeche ti sinte opfere. 2 Tee khan mitlaytich um keen mit weem khee khëntnis hot un mit weem feele macht, wayl tee mus aach mit tëm sayn aychne xwacheete um keen, 3 un weeche tas, mus tee opfere weeche sayn aychne sinte mache, soo wii tee fer ti sinte fon tëm folek macht. 4 Nimant tuut tiise eere fon sayn aychne wile fer sich hoole, awer tuut tii ploos kriin wën er fon Kot keruuft këpt, soo wii Aaron keruuft këp waar. 5 In te selwich aat, hot te Kristus net hërlichkheet fer sich selepst kep, torich sich selepst wii hooche priister in setse, awer tee hot ti hërlichkheet kriit fon Tëm woo fer iim kesaat hot: “Tuu pist mayn soon; hayt sin ich tayn fater kep.” 6 Soo, wii ëyer aach in een aner teel fon te Xrifte saat: “Tuu pist fer imer te hooche priister, soo wii Melkisetëk waar.” 7 Wii Kristus uf te Eyert keleept hot, hot eyer tings in kepeet ferlangt un aan kehal, mit fiile krayxe un treene, fer Tëm woo tee fom toot rete khont; un tee is weeche sayn tiif respekt tsu Kot, aan keheert kep. 8 Opwool eyer soon waar, hot eyer ti folichkheet kelërnt weeche ti tinge woo tee kelit hot. 9 Un noo tas eyer perfekt kemacht kep is, hot eyer es meechlich kemacht tas al woo tëm foliche, ti eewich retung kreechte, 10 wayl tee is fon Kot in kesëtst këp wii hooche priister, soo wii Melkisetëk waar. 11 Meyer khene fiil iwer tëm xpreche, awer tas is xweyer fer aus leye, wayl teyer sayt lamsam kep fer ti tinge ferxteen. 12 Wayl, opwool teyer mist xon leerer sin, praycht teyer noch mool tas yemant, fom aanfang aan, aych ti haupste funtamente fon Kot sayn hayliche wërter in lërnt. Teyer praycht noch mool milich, net xtark esmitel. 13 Wayl yeete eene woo noch milich trinkt, tuut tas wort fon te kerechtichkheet net khëne, wayl eyer een kleen khint is. 14 Awer tas xtark esmitel is fer rayfe mënxe, fer tii woo torich ti penutsung sayne ferxtant keiipt hon fer se wise ti unerxiit tswixich was richtich un was ferkheert is.