Yoohan

14 “Lost ayer hërts net unruych kepe. Klaapt* aan Kot un klaapt aach aan mich. 2 In mayne Fater sayn haus kepts fiile woonunge. Wëns net soo weyer, hët ich es aych kesaat, wayl ich keen hin fer een plats fer aych foer perayte. 3 Un wën ich faat keen un aych een plats foer perayte, tuun ich noch mool khome un aych mit nëme tas tat woo ich sin, teyer aach sayt. 6 Yeesus hot tëm keantwort: “Ich sin te weech, ti woerheet un tas leepe. Nimant khomt tsum Fater heekstens torich mich. 7 Wën iir mich kekhënt hët, teet iir aach mayn Fater khëne. Fon yets am foran tuut iir tëm khëne un tëm siin. 9 Yeesus hot tëm keantwort: “Fiilip, ich sin xon een lang tsayt pay aych un tuu khënst mich noch net? Weer mich siit, siit aach te Fater. Wii khanst tuu mich saan: ‘Tsaych uns te Fater’? 10 Klaapst tuu net tas ich eenich mim Fater sin un tas te Fater eenich mit mich is? Was ich aych saan, khomt net fon mich heyer, awer te Fater, woo eenich mit mich playpt, macht Sayn aarwayte torich mich. 12 Weer aan mich klaape iipt, tuut aach ti aarwayt mache woo ich mache. Un er tuut kreeser aarwayte wii tiise mache, wayl ich keen tsurik tsu mayn Fater. 13 Un aach, ales was teyer in mayn naame ferlangt, tas mache ich, tas te Fater torich sayn Soon kehërlicht wëre sol. 14 Een tuun was teyer in mayn naame ferlangt, tas mache ich. 15 “Wën teyer mich liipt, tuut teyer mayn kepoote aan heere. 16 Un ich ferlange fer te Fater un eyer kept aych een aner helfer fer mit aych fer imer plaype: 17 te kayst fon woerheet, woo ti welt net kriin khan, wayl tii tuut tee net siin un aach net khëne... 21 Weer mayn kepoote aan nëmt un se in halt, tee liipt mich. Un weer mich liipt wërt fon mayne Fater keliipt, un ich wëre tee liipe un mich taytlich tsayche fer iim. 23 Yeesus hot iim keantwort: “Wën yemant mich liipt, tuut tee mayn wort aan heere, un mayn Fater tuut tee liipe, un mëyer keen tsu iim un tuun pay iim woone.” 26 Awer te helfer, te hayliche kayst, woo te fater in mayn naame xikt, tuut ales fer aych in lërne un tuut aych erinere mache, fon ales was ich fer aych saat. 27 Ich lose aych te friit; ich kepe aych mayne friit. Ich kepe tas fer aych net soo wii ti welt tas kept. Lost net tas ayer hërts unruych un mit pang wërt. 28 Tëyer hot keheert, tas ich tsu aych kesaat hon: ‘Ich keen fat un tuun tsurik tsu aych khome.’ Wën tëyer mich liipe teet, wëyert tëyer froo tas ich tsum Fater keen, wayl te Fater is kreeser wii ich. 30 Ich tuun net mee fiil mit aych xpreche, wayl tee kheenich fon te wëlt is am khome un tee hot khee macht iwer mich. 31 Awer, tas ti welt wise sol tas ich tëm Fater liipe, mache ich kraat soo wii te Fater mich kexikt hot. Xtayt uf un wole mer faart keen.