1te Pheeter

3 Kraat soo, tuu, fraa, respektiir ti autoriteet fon tayne man. Soo, wën tee net tas Wort aan heert, khan tee oone wërter kewun wëre, torich ti aat wii sayn fraa sich aan xtelt, 2 wayl tee mit sayn aychne aue kesiin hot wiis tuu tich ferninftich un mit tiife respëkt aan xtelst. 3 Ayre xeenheet sol net ausweenich sin, wii mit keflechte hoer, koltne xmuke orer faynes tsaych, 4 awer es sol te inerliche mënx fom hërts sin, een xeenheet woo fer imer halt, woo fon een ruych un tsaam aanxtelung khomt, woo fiil weyert foer Kot sayn aue hot. 5 Wayl soo hon sich ferxmikt ti friirixe hayliche fraae woo uf Kot kewaart hon. Tii hon sich unich ti autoriteet fon iire man kextelt, 6 soo wii Sara, woo Apraham kefolicht hot un tëm wii hër kenënt hot. Tuu wërst tëne sayn tochter, wëns tuu wayter tas kuutes machst un net lost ti angst tich kewine. 7 Kraat soo, tuu, man, leep wayter mit tayn fraa soo wii es mim khëntnis xtimt. Kep tëne eer wii eene xweecher waase, te waypliche, wayl tii tuut aach tas unfertiintne kexenk fom leepe mit teer ërpe. Wën net, tuut Kot tayn kepeete net heere. 8 Tsum xlus, tuut al ti selwiche ketanke hon, tsaycht empatii, tuut priiterlich liip, liiplich mitlayt un teemuut hon. 9 Tuut net xlechtes mit xlechtes un pelaytichung mit pelaytichung tsurik petsaale. Xtats tas, tuut mit een seechen tsurik petsaale, wayl teyer too tefoer keruuft kep sayt, fer een seechen se ërpe. 10 Wayl “tee woo tas leepe liipt un wil frooe taache siin, mus uf phase tas sayn tsung net xlechtes saat un sayne lipe sole net petrooe. 11 Tas tee fon xlechtes sich ap lenkt un macht was kuut is; tas tee te friit suucht un tëm noo xpringt. 12 Wayl Yeehoowa sayn aue sin uf te kerechte un sayn oore heere sayn ërnste kepeete; awer Yeehoowa sayn kesicht is keeche tii kextelt woo tas xlechtes mache”. 13 In wërklichkheet, weer tuut xaate fer aych mache, wën tëyer flaysich sayt aan was kuut is? 14 Awer, soo kaar wën teyer weeche ti kerechtichkheet layt, sayt teyer froo. Awer, tuut khee pang hon fon was tëne pang macht, un wërt net unruych. 15 Awer tuut te Kristus wii Hër in ayer hërts ferhayliche un sayt imer fërtich fer een antwort kepe fer yeete eene woo aych ferlangt een uersach fer ti hofnung woo teyer hot; awer macht tas imer mit tsaamheet un tiif respekt. 16 Halt een kuute kewise. Soo, imer wën se etwas keeche aych saan, tuun se sich xeeme wayl teyer een kuut aanxtelung wii Kristus sayn nookeener hot. 17 Wayl es is peser tas tëyer layte tuut wayl tëyer tas kuutes macht, wën Kot tas erlaupt, als layte wayl tëyer tas xlechtes macht. 18 Wayl Kristus is een mool fer imer fer ti sinte kextorep, een kerechte fer ti unkerechte, fer aych tsu Kot fiire. Eyer is im flayx um keprung kep, awer is im kayst wiiter lepeentich kemacht kep. 19 Un soo, is tee kang un hot tsu te kayster, woo in kexpërt waare, kepreeticht. 20 Tii hate Kot net aan keheert wii Tee mit ketult in Noee sayn taache kewaart hot, wii Noee ti arich am paue waar. In tiise arich sin phaar layt — 8 mënxe — in sicherheet torich tas waser ketraa kep. 21 Ti taaf, woo tas representiirt, tuut aach aych yets rete (net torich tas trek fon flayx sauwer mache, awer torich een kuut kewise foer Kot hon), torich Yeesus Kristus sayn ufxtaye fom toot. 22 Tee is uf Kot sayn rechts sayt, wayl tee is tsum himel kang; un engele, autoriteete un krafte sin unich tëm ketuun kep.