Romaaner
12 Tes weeche, tuun ich fer aych aan hale, priiter, torich Kot sayn mitlayt, tas teyer ayer khërper foer xtelt wii een lepeentich opfer, woo haylich is un woo Kot kefalt. Un soo tuut teyer een haylich tiinst mache mit ayre ferxtant. 2 Un lost net tiise welt aych wayter mustere; xtats tas, ferënert aych un macht ayre ferxtant nay. Soo, khent teyer fer aych selepst pewayse was Kot sayne kuute, xeene un perfekte wile is. 3 “Weeche ti kuutheet woo fer mich ketsaycht kep is, tuun ich fer yeete eene fon aych saan, tas teyer net fon aych selepst mee tenke solt wiis neetich is, awer tas yeete eene tenke solt in een aat woo ferninftichkheet tsaycht.” 4 Wayl, soo wii meyer fiile teele in ploos eene khërper hon, awer al ti teele hon net te selwiche tswek, 5 tan, opwool meyer fiile sin, sin mer ploos eene khërper in eenichkheet mit Kristus, awer, yeete eene fon uns is een teel woo eene tsu te anere keheert. 6 Meyer hon unerxiitliche kexenke tëm noo ti unfertiint kuutheet woo uns kep waar; tes weeche, wën tas kexenk fon profetsii is, wole mer profetisiire tëm noo unser klaape; 7 wën es fer se tiine is, wole mer tiine; weer tas kexenk fer in lërne hot, tas eyer in lërnt; 8 weer tas kexenk fer uf muute hot, tas eyer uf muut; weer aus teelt, mach es mit krooshërtslichkheet; weer fiirt, mach es mit flaysichkheet; weer parmhërtslichkheet tsaycht, mach es mit frayt. 9 Ayre liip sol eerlich sin. Tuut tiif hase was xlecht is; halt aych fest aan was kuut is. 10 Mit priiterlich liip, tuut hërtsliche xpiirunge eene tsu te aner hon. Tuut te eyerste xrit kepe fer ti anere eere. 11 Sayt flaysich, un net faulënser. Sayt flaysich im kayst. Xaft wii sklaawe fer Yeehoowa. 12 Frayt aych in te hofnung. Halt aus in te xwiirichkheet. Tuut wayter peete. 13 Ferteelt mit te hayliche was teyer hat, tëm noo tëne sayn neetichkheete. Tsaycht imer hospitaliteet. 14 Seechnet tii woo aych yachte tuun; seechnet un tuut net ferfluuche. 15 Frayt aych mit tii woo sich fraye, prilt mit tii woo prile. 16 Tuut ale layt in te selwich aat pehantele, soo wii teyer aych selepst pehantele tuut; sayt net hoochmuutich, awer lost aych fon te teemuutiche tinge fiire. Sayt net kluuch foer ayre aychne aue. 17 Tuut net xlechtes mit xlechtes fer yemant tsurik petsaale. Khimert aych mit was ti layt mëne richtich is. 18 Wëns meechlich is, soo wayt wii tas fon aych ap hëngt, sayt friitlich mit ale kaar. 19 Liipe layt, tuut net tsurik petsaale, awer kept plats fer Kot sayn wuut; wayl es xteet kexrip: “‘Ich sin tee woo xtrooft; ich tuun es tsurik petsaale’, saat Yeehoowa.” 20 Awer, “wën tayn faynt hunger hot, kep tëm was tsu ese; wën eyer torst hot, kep tëm was tsu trinke; wayl wëns tuu tas machst, tuust tuu roote khoole uf sayn khop samele”. 21 Los tich net fom xlechtes kewine. Awer tuu wayter tas xlechtes mit tëm kuutes ap kewine.