Ëstras

1 Im eyerste yoer fon Sirus, kheenich fon Përsya, solt tas wort fon Yeehoowa sich erfiile woo torich Yeeremias aus kexprooch kep is. Yeehoowa hot tas hërts fon Sirus, kheenich fon Përsya, uf kemuut, tas eyer in sayn kanse raych een pekhantmachung mache solt, woo eyer aach rexistriirt hat. Es hot kesaat: 2 “Soo saat Sirus, kheenich fon Përsya: ‘Yeehoowa, te Kot fom himel, hot mich ti kanse rechiirunge fon te eyert kep, un tee hot mich in kesetst fer tëm een haus in Yeruusalem, woo in Yutaa is, paue. 3 Weer fon aych keheert tsu tëm sayn folek? Sayn Kot sol mit tëm sin. Eyer sol tsu Yeruusalem, in Yutaa, keen un tas haus fon Yeehoowa, te Kot fon Israël, noch mool uf paue. Tee is te woer Kot un sayn haus waar in Yeruusalem kewees. 4 Yeete auslënter, ekaal woo tee woont, sol fon sayn nochpere keholef sin. Tii sole tëm kolt, silper, aychentum, fii, un fraywiliche opfer kepe fer tas haus fon tëm woere Kot woo in Yeruusalem waar.” 5 Tan, hon ti xëfe fon te faterliche hayser fon Yutaa un fon Penjamin, un ti priister un ti lewiiter — al tii woo te woere Kot uf kemuut hot —, sich foer perayt fer se keen un Yeehoowa sayn haus woo in Yeruusalem waar noch mool uf paue. 6 Tëne iire kanse nochpere hon se keholef. Tii hon tëne tinge kep fon silper, fon kolt, aychentum, fii, un tinge woo weyert hate, un aach ti kanse fraywiliche opfere.