1te Thesalooniker

5 Yets, weeche ti tsayte un xtune, priiter, is es net nootwenich aych etwas xraype. 2 Wayl teyer selepst wist tas Yeehoowa sayn taach kenau soo khomt wii een xpitspuup in te nacht. 3 Wën se saan tuun: “Friit un sicherheet!”, tan khomt klaych iwer tëne ti pletslich fernichtung, soo wii ti phayn woo iwer ti xwanger fraa khomt, un tii tuun uf khee aat aus rayse. 4 Awer teyer, priiter, sayt net im tunkel, tas ti tsayt aych iwerfalt soo wii een xpitspuup iwerfalt, 5 wayl teyer al sayt khiner fom licht un khiner fom taach. Meyer keheere net tsu te nacht orer tsu te tunkelheet. 6 Tes weeche, mer sole net xloofe soo wii ti anere mache, awer meyer sole uns wachsam un ferninftich hale. 7 Wayl tii woo xloofe, tuun oomts xloofe; un tii woo pesof wëre, sin oomts pesof. 8 Awer meyer, woo tsum taach keheere, wole mer ferninftich sin un aach aan tuun tas prust xilt fon klaape un liip un ti hofnung fon retung wii een ayse khap. 10 Eyer is fer uns kextorep, tas, op mer wach sin orer am xloofe, leepe mer mitsamer mit tëm. 11 Tes weeche, tuut wayter eene ti anere uf muute un ferxtërke, soo wii teyer wërklich am mache sayt. 12 Meyer ferlange aych yets, priiter, tas teyer respekt tsaycht fer tii woo flaysich tswixich aych xafe, woo aych im Hër fiire un woo aych aan reete tuun; 13 weeche ti aarwayt woo se mache, kept fiil weyert tsu tëne un liipt se. Sayt friitlich eene mit te anere. 14 Uf te aner sayt, priiter, mer muute aych uf: kept xtarke aanreete fer ti unfoliche; treest ti tiifsiniche; xtitst ti xwache; sayt ketultich mit ale kaar. 15 Phast uf tas nimant xlechtes mit xlechtes tsurik petsaalt, awer xtrengt aych aan fer imer kuutes tuun eene tsum anere un tsu al. 17 Tuut imer peete. 18 Tuut weeche ales tanke. Tas is Kot sayn wile fer aych, in Yeesus Kristus. 19 Macht net tas fayer fom kayst aus. 20 Tuut net ti profetsiie oone respekt pehantele. 21 Pewayst ales; halt aych fest aan tas kuutes. 23 Te Kot fon friit sol aych kans ferhayliche. Un priiter, tas torich ti presëns fon unser Hër Yeesus Kristus, ayre kayst, seel un khërper sich rayn un kesunt in ale aate hale.