Xeenesis

45 Tes weeche, khont Yoosef sich net mee foer sayn kanse tiiner fest hale. Too, hot tee kexraayt: “Xikt se al raus!” Nimant mee waar mit Yoosef keweest wii tee sich fer sayn priiter erkhëne kelos hot. 2 Un tee hot aan kefang soo hart se prile tas ti ejipter tas keheert hon, un Faraoo sayn haus hot tas keheert. 3 Am ën, hot Yoosef fer sayn priiter kesaat: “Ich sin Yoosef. Tuut mayn fater noch leepe?” Awer sayn priiter khonte fer tee niks antworte, wayl weeche tëm tii sich soo ferwunert hate. 4 Un soo hot Yoosef fer sayn priiter kesaat: “Pite, khomt tichter.” Un tii sin tichter pay tee khom. Tee saat: “Ich sin Yoosef, ayer pruuter, woo teyer fer ti ejipter ferkhaaft hot. 5 Awer yets, playpt net unruych un tuut net eene te anere ferxëne wayl teyer mich fer ti ejipter ferkhaaft hot; wayl Kot mich xon foer aych kexikt hot fer leepe se hale. 6 Tas is tas tsweete yoer fon hungernoot in tëm lant, un hon mer noch finef yoore woo khee plantsung un khee ërntung kepe tuut. 7 Awer Kot hot mich xon foer aych kexikt fer een rest fer aych, im lant se lose, un fer torich een kroos pefrayung aych lepeentich hale. 8 Soo, es waar net teyer woo mich too hin kexikt hot, awer tas waar te woere Kot, fer mich in se xtele wii te haupste aanreeter fom Faraoo, hër fon sayn kans haus un fiirer fom kans lant fom Ejipt. 9 “Keet xnël tsurik noo mayn fater un saat fer tee: ‘Soo saat tayn soon Yoosef: “Kot hot mich in kextelt wii hër fon kanse Ejipt. Khom tsu meer. Tuu net lang tauere. 10 Tuu tuust ins lant fon Koosen woone keen, woos tuu ticht pay meer pist – tuu, tayn khiner, tayne enkelskhiner, tayn xeef, tayn rints fii un ales was tuu host. 11 Tat kepe ich fer tich esmitel, wayl tas kept noch finef yoore mit hungernoot. In keeche teel, tuu, tayn haus un ales was tuu host tuun in aarmheet fale.”’ 12 Teyer un mayn pruuter Penjamin khënt yets mit ayere aychne aue siin, tas sin ich selepst woo mit aych xpreche tuun. 13 Un soo, xprecht fer mayn fater ti kans hërlichkheet woo ich im Ejipt hon un ales was teyer kesiin hot. Yets, keet xnël un tuut mayne fater hoole keen.” 14 Too, hot tee een umaarem aan Penjamin, sayn pruuter, kep, un aan kefang se prile; un Penjamin hot aach in prile tëm een umaarem kep. 15 Tee hot sayn priiter al kekhust un in prile tëne een umaarem kep; noo tëm, hon sayn priiter mit tëm kexproch.