Hepreeyer
10 Tas Kesets is een xate fon te kuute tinge woo khome teete, net ti wërklichkheet selepst. Tes weeche, tas khan nii perfekt mache tii woo tichter khome fer aan peete mit te selwiche opfere woo wayter yoer noom yoer keopfert sin. 2 Wën net, weyere ti opfere net mee kemacht; wayl wën tii woo een haylich tiinst mache xon rayn kemacht weyere, teete net mee sayn sinte erkhëne. 3 Xtats tas, sin tiise opfere yoer noom yoer een erinerung fon te sinte, 4 wayl es is net meechlich tas tas pluut fon xtiire un fon kaprite pek ti sinte wech hoole tuut. 5 Tes weeche, wii eyer in te welt rin khom is, hot eyer kesaat: “‘Tuu wolst net opfere, awer tuu host een khërper mich in kericht. 6 Tuu host net ti ferprentne opfere un aach net ti opfere fer ti sinte aan kenom.’ 7 Tan hon ich kesaat: ‘Too sin ich (in tëm rol is iwer mich kexrip) fer tayn wile mache, oo Kot.’” 10 Weeche tiise wile, sin mer ferhaylicht kep torich te opfer fon Yeesus Kristus sayn khërper — een mool fer imer. 12 Awer tiise man hot een eensiche opfer fer imer fer ti sinte aan kepoot un sich tsu te rechts sayt fon Kot kesetst, 13 fon too aan wayter hot er kewaart pis sayn faynte unich sayn fiis ketuun wëre. 19 Tës weeche, priiter, wayl mëyer fertraung hon fer te weech penutse fer in tas hayliche plats rin khome torich Yeesus sayn pluut, 20 te naye un lepeentiche weech woo eyer fer uns uf kemacht hot torich te foerhang, tas is, sayn flayx, 21 un wayl mëyer hon eene kroose priister iwich tas haus fon Kot, 22 wole mer mit eerliche hërtse un fol klaape tichter khome, wayl unser hërtse sin fon een xlecht kewise rayn kemacht kep un unser khërper sin mit rayn waser kepaat kep. 23 Wole mer uns fest hale aan te puuplix ausxprechung fon unser hofnung, oone wakele, wayl tee woos ferxproch hot, is troy. 24 Un wole mer uns eene mit te anere khimere fer uns naner uf muute liip tsayche un kuute aarwayte mache; 25 un xtats noo lose uns fersamele, wii welche keweent sin, wole mer uns naner uf muute; un macht tas noch mee wën teyer siit te taach tichter khome. 26 Awer wën meyer fer kërn noo un noo sinte, noo tas mer een kenaue khëntnis fon te woerheet kriit hon, kept es khee mer opfer fer unser sinte. 33 Teyer waart foer al kexënt un keyacht. (...) 35 Tes weeche, tuut net im xtich lose ayre koraaj, woo raychlich peloont wërt. 36 Wayl teyer mist aus hale fer Kot sayn wile fërtich mache un tan siin ti erfiilung fon Sayn ferxpreche. 37 Wayl, ploos “noch een kleen pisye tsayt”, un “tee woo khome tuut, khomt, un tee tuut sich net ferxpeete”. 38 “Awer mayn kerechte tuut weeche te klaape leepe”, un “wën eyer tsurik keet, tuun ich mich net fon tëm kefale”. 39 Awer, meyer sin net fon tëne woo tsurik fer ti fernichtung keen, awer fon tëne woo klaape hon fer tas leepe rete.