1te Kheeniche

13 Torich Yeehoowa sayn wort, is eene man fon Kot fon Yutaa tsu Petël kang un is khom wii Yeropoan pay te altar waar fer opfer tamp mache. 2 Tan, torich Yeehoowa sayn wort, hot te man keeche te altar aus kexproch: “O altar, altar! Soo saat Yeehoowa: ‘Kuk! In Tawi sayn haus, tuut eene soon uf ti welt khome woo Josiias keruuft wërt. Eyer tuut uf tich ti priister fon ti hooche pletse opfer, tii woo opfer tamp uf tich mache, un uf tich ti knoche fon mëner ferprëne.’” 6 Too teweeche, hot te kheenich fer te man fom woere Kot kesaat: “Pite, hal Yeehoowa sayn hilef aan, un peet fer mich tas eyer mayn hant heele sol.” Tan, hot te man fom woere Kot hilef tsu Yeehoowa aan kehal, un tëm kheenich sayn hant is kesunt kep wiis foer heyer waar. 7 Te kheenich hot tan fer te man fom woere Kot kesaat: “Khom mit mich tsu mayn haus fer etwas ese un ich tuun tich aach een kexenk kepe.” 8 Awer te man fom woere Kot hot fer te kheenich keantwort: “Aach wëns tuu mich ti heleft fon tayn haus kepe teest, teet ich net mit tich keen, aach khee proot ese un khee waser fon tiise plats trinke. 9 Wayl Yeehoowa hot mich tiise wërter kesaat: ‘Tuu thërfst khee proot ese, khee waser trinke un aach net tsurik keen uf tëm selwich weech woos tuu khom pist.’” 10 Tan, is eyer fon Petël uf een aner weech faart kang un is net uf tëm selwich weech tsurik kang. 14 Eyer is te man fom woere Kot noo kang un hot tëm kesiin unich een kroose paam sitse. Tan, hot eyer tëm kefroot: “Pist tuu te man fom woere Kot woo fon Yutaa khom is?” Eyer hot keantwort: “Yaa, ich sin.” 15 Te alte profeet hot tëm kesaat: “Khom mit mich in mayn haus un tuu proot ese.” 16 Awer te man hot kesaat: “Ich thërf net mit tich tsurik keen un tayn inlaatung aan nëme. Ich thërf aach khee proot ese un khee waser mit tich in tiise plats trinke. 17 Wayl Yeehoowa hot mich tiise wërter kesaat: ‘Tuu thërfst khee proot ese, aach khee waser tat trinke. Kee net tsurik uf tëm weech fon woos tuu khom pist.’” 18 Te alte profeet hot tëm kesaat: “Ich sin aach een profeet soo wiis tuu un een engel hot mich tiise wërter fon Yeehoowa kesaat: ‘Nëm tee mit tich tsu tayn haus fer proot ese un waser trinke.’” (Eyer hot tëm hinerkang.) 19 Soo is te man mit tëm tsurik kang fer in sayn haus proot ese un waser trinke. 20 Wii se am tix kesetst sin, hot te profeet, woo te man tsurik kehool hot, een pexeet fon Yeehoowa kriit 21 un hot fer te man fom woere Kot, fon Yutaa, hart kesaat: “Soo saat Yeehoowa: ‘Tuu host tich keeche Yeehoowa sayn wërter kextelt un host tas kepoot woo Yeehoowa, tayn Kot, tich kep hot, net in kehal. 22 Xtats tas, pist tuu tsurik kang fer hiir proot ese un waser trinke, opwool Yeehoowa tich kesaat hot: “Tuu khee proot ese un khee waser trinke.” Weeche tas, tuut tayn khërper net ins kraap fon tayn foerfatere keleet wëre.’”