Apokalipsis

7 Noo tas, hon ich fier ëngele kesiin woo in te fier eke fon te Ëyert xteen keplip waare, un woo ti fier wint fon te Ëyert fest kehal hon, in een aat woo khee wint khont iwer ti Ëyert ploose, aach net iwer tas meer un iwer khee paam 2 Un ich hon een aner ëngel kesiin, ruf khome fon te ufkang fon te sun, mit een selo fon tëm lepeentiche Kot, un tee hot in hart xtim kexraayt fer ti fier ëngele woo tee erlaupt hot xaate fer ti eyert un fer tas meer mache: 3 “Tuut net xaate fer ti Ëyert mache, un aach net fer tas meer un ti peem, pis mëyer ti xtëne fon te sklaawe fon unser Kot markiire tuun.” 4 Tan, hon ich ti numer fon tëne woo markiirt sin keheert: 144.000, woo fom kans xtam fon te khiner fon Israël markiirt sin: 5 fom Yutaa xtam sin 12.000 markiirt, fom Rupen xtam, 12.000; fom Kat xtam, 12.000; 6 fom Asër xtam, 12.000, fom Naftalii xtam, 12.000; fom Manasës xtam, 12.000; 7 fom Simeoon xtam, 12.000; fom Lewii xtam, 12.000; fom Isakaar xtam, 12.000; 8 fom Sepuloon xtam, 12.000; fom Yoosef xtam, 12.000; fom Penjamin, 12.000 woo markiirt sin. 9 Nochter, hon ich een kroos folek kesiin, woo niimant tseele khont, fon ale natsyoone, xteme, foleke un xprooche, woo foer tëm troon un foer tëm Lam kextan hon. Tii hate lang ways tsaych aan un hate phalm rayse in tëne sayn hënt. 10 Un tii hon in hart xtim kesaat: “Unser retung khomt fon unser Kot, woo uf tëm troon setst, un fon tëm Lam.” 11 Al ti engele waare xteen keplip um ti elteste sayn troon un um ti lepeentiche kriatuure rom; un tii hon sich foer tëm troon kepikt un sayn kesicht uf tëm pootem ketuun un Kot aan kepeet 12 un kesaat: “Amen! Tas loop, ti hërlichkheet, ti kluucheet, ti tanke, ti eer, ti macht un ti kraft keheere tsu unser Kot fer imer. Amen.” 13 Tan, eene fon te elteste hot mich kefroot: “Tii woo hon lang ways tsaych aan, weer sin tii un fon woo sin se heyer?” 14 Soo, hon ich tëm klaych kesaat: “Mayn hër, tuu weest es.” Too hot tee fer mich kesaat: “Tas sin tii woo fon te kroos tripulatsyoon raus khom sin; un tii hon sayn lang tsaych kewext un im pluut fom Lam ways kemacht. 15 Es is weeche tas woo se foer Kot sayn troon sin, un tuun se tëm hayliche tiinst taach un nacht in sayn thempel mache; Tee woo uf tëm troon setst, tuut sayn parak iwer tii xpane. 16 Tii tuun khee hunger mee xpiire, un aach khee torst, un ti sun un ti hits tuun se nii mee kweele, 17 wayl tas Lam, woo in te mite fom troon is, tuut se wii een xeefer uf phase un tsu waser kwele fom leepe lënke. Un Kot tuut yeete treene fon tëne sayn aue ap trokne.”