2te Kroonike

2 Asa hot kemacht was foer ti aue fon Yeehoowa, sayn Kot, richtich un kuut waar. 3 Eyer hot ti altare fon te frëmte keeter un ti hooche pletse wech kexaft, ti hayliche pheele ferprokelt, un ti hayliche hols phoste ap kexnit. 4 Un noch, tee hot Yutaa kesaat fer Yeehoowa suuche, te Kot fon sayne foerkhomer, un fer tas Kesets un ti kepoote aan heere. 6 Tee hot ferxtërkte xtete in Yutaa kepaut wayl es hot friit im lant kep. Torich al tiise yoore es hot khee kriich keeche tëm kep, wayl Yeehoowa hot tëm ruu kep. 7 Tee hot fer Yutaa kesaat: “Wole mer tiise xtete paue, un wole mer tëne ferxtërke mit mauer, thorme, toore un riichele. Wayl tas lant is noch unich unser kontrol, wayl mer hon Yeehoowa, unser Kot, kesuucht. Meyer hon tëm kesuucht, un uf al ti sayte hot eyer uns friit kep.” Un sayn paueray is kans kuut ap kelaaft. 8 Asa hot een militeer mit 300.000 kriichs mëner in Yutaa kehat woo kroose xilte un lantse hate. Fon Penjamin waare 280.000 koraajiche kriichs mëner woo kleene xilte hate un waare mit pooche pewaft. 9 Xpeeter, is Seraa, te etioper, keeche tëne khom mit een militeer fon 1.000.000 mëner un 300 kriichs ween. Wii Seraa in Maresa aan khom is, 10 is Asa raus kang fer keeche tëm khëmpfe. Tan, im taal fom Sefata, pay Maresa, hon se sich in khampf formatsyoon kextelt. 11 Tan, hot Asa Yeehoowa, sayn Kot, soo aan keruuft: “Oo Yeehoowa, fer tich is es ekaal op tii woos tuu helefst xtark orer xwach sin. Helef uns, oo Yeehoowa, unser Kot, wayl mer uf tich traue, un in tayne naame sin mer keeche tiise folek khom. Oo Yeehoowa, tuu pist unser Kot. Los net tas khee mënx xtërker wiis tuu sin.” 12 Soo, hot Yeehoowa ti etioper foer Asa un Yutaa ap kewun, un ti etioper sin aus keris. 13 Asa un ti kriichs mëner, woo mit tëm waare, sin tëne pis Kerar noo kang, hon ti etioper um keprung pis khee eene mee keleept hot, wayl tii sin fon Yeehoowa un sayn militeer ap kewun un fernicht woer. Nochter, ti mëner fon Yutaa hon fiile weyertliche tinge kehool. 14 Un tii hon noch ti kanse xtete um Kerar rom iwerfal, wayl weeche Yeehoowa hate se fiil pang kehat; un hon fiile tinge fon ti xtete fer sich kehool wayl waare fiile weyertliche tinge in tëne.