1te Yoohan

2 Mayn khinerche, ich xraype aych tiise tinge tas teyer net sinte macht. Awer, wën yemant een sint macht, hon mer een helfer pay te Fater: Yeesus Kristus, eene kerechte. 2 Un tee is een opfer woo unser sinte tekt un uns mit Kot fereenicht; awer net ploos unser sinte, awer aach ti sinte fon te kans welt. 3 Un torich tas, wise mer tas meyer iim khëne tuun: wën mer wayter tëm sayn kepoote aan heere tuun. 4 Weer saat: “Ich khëne iim”, un noch soo net sayn kepoote aan heert, is een lichner, un ti woerheet is net aan tëm. 5 Awer, wën yemant sayn wort aan heert, Kot sayn liip is in tëm wërklich komplët kemacht kep. Torich tas, wise mer tas mëyer in eenichkheet mit tëm sin. 6 Weer saat tas eyer in eenichkheet mit tëm playpt, sol wayter leepe soo wii Yeesus keleept hot. 7 Keliipte, ich xraype aych net een nayes kepoot, awer een alt kepoot, woo tëyer fon aanfang aan hat. Tiise alt kepoot is tas wort woo tëyer keheert hot. 8 Awer, ich xraype aych een nayes kepoot, etwas woo woer fer Yeesus Kristus is un aach fer aych, wayl ti tunkelheet keet rom un tas woere licht tuut xon xayne. 14 Ich xraype fer aych, fatere, wayl iir khënt tee woo fon aanfang aan is. Ich xraype fer aych, yunge mëner, wayl iir xtark sayt un Kot sayn wort playpt in aych un iir hot te Xlechter ap kewun. 15 Tuut net ti welt un ti tinge fon te welt liipe. Wën yemant ti welt liipt, is ti liip fom Fater net in tëm; 16 wayl ales was uf te welt is — te wunx fom flayx, te wunx fon te aue un sich proose weeche was te mënx hot — khomt net fom Fater, awer khomt fon te welt. 17 Un noch: ti welt un sayne luste tuun rom keen, awer weer Kot sayn wile macht, playpt fer imer. 22 Weer is te liichner? Is es net tee woo saat tas Yeesus net te Kristus is? . . .