Lewiitikus

20 Yeehoowa hot fer Mooses kesaat: 2 “Saa fer ti israeliiter: ‘Wën een israeliiter orer een auslënter woo in Israël woont, een fon sayn nookhomer fer Molok kept, sicher sol eyer um keprung wëre. Tas folek fom lant sol eyer mit xteen ferxmayse pis te toot. 3 Sicher tuun ich mich selepst keeche tiise man xtele, un tee fon sayn folek wech xafe wayl eyer een fon sayn nookhomer fer Molok kep hot, un hot oone respëkt mayn haylich plats un mayn haylich naame pehantelt. 4 Wën tas folek fom lant fer kërn ti aue tsu macht fer was tiise man kemacht hot, wën eyer een nookhomer fer Molok kept, un tii tëm net um pringe, 5 tan, tuun ich mich sicher keeche tiise man un sayn familye xtele. Ich tuun tee fon sayn folek wech xafe tsusamer mit al tii woo mit tëm tsu Molok sich prostituiirt hon. 6 “‘Fer te persoon woo suucht tii woo kayste aan ruufe un tii woo te futuer foer raus saan, un sich mit tëne kaystlich prostituiirt, tuun ich mich sicher keeche tiise persoon xtele un tee fon sayn folek wech xafe. 7 “‘Ferhaylicht aych un sayt haylich, wayl ich sin Yeehoowa, ayre Kot. 8 Folicht un halt mayn kepoote in. Ich sin Yeehoowa, woo aych ferhayliche. 9 “‘Wën eene man sayn fater orer sayn muter ferfluucht, sicher mus eyer um keprung wëre. Wayl tee sayn fater orer sayn muter ferfluucht hot, hot eyer selepst ti xult fer sayn toot. 10 “‘Wën eene man atultëryo macht mit te fraa fon een aner man, yaa, wën eyer atultëryo macht mit te fraa fon sayn neekste, sicher mus eyer um keprung wëre, te man un ti fraa. 11 Te man woo sëks macht mit te fraa fon sayn fater, pringt xaam fer sayn fater. Ti tswaay mise sicher um keprung wëre. Tii selepst hon ti xult fer sayn toot. 12 Wën eene man sëks mit sayn xwiichertochter macht, ti tswaay mise sicher um keprung wëre. Tii sin keeche was natiirlich is, kang. Tii selepst hon ti xult fer sayn toot. 13 “‘Wën eene man sëks mit een aner man macht, soo wii es kemacht is mit een fraa, ti tswaay mache etwas apxayliches. Tii mise sicher um keprung wëre. Tii selepst hon ti xult fer sayn toot. 22 “‘Tuut ale mayn kepoote un kerichts entxlise in hale un foliche, tas teyer net kekhotst wërt fom lant woo ich aych nëme fer se woone. 23 Tuut net ti kepoote fon te natsyoone woo ich foer aych wech xike, foliche, wayl tii hon tiise tinge al kemacht, un tii kepe mich te eekel. 24 Tes weeche hon ich fer aych kesaat: “Tëne sayn lant tuut fer aych keheere, un ich tuun tas lant fer aych kepe wii ayer aychentum, een lant woo raychlich milich un honich kept. Ich sin Yeehoowa ayer Kot, woo aych fon te anere foleke aus naner kemacht hot.” 25 Macht een unerxiit tswixich rayne un unrayne tiere, un aach tswixich rayne un unrayne feechel; tuut net apxaylich wëre weeche ti tiere, ti feechel un was woo ufm pootem sich xlept. Ich hon klaar kelos tas tii wëre unrayn fer aych sin. 26 Teyer solt haylich fer mich sin, wayl ich, Yeehoowa, sin haylich; un ich tuun aych fon te anere foleke aus naner mache fer tsu mich keheere. 27 “‘Te man orer ti fraa woo kayste aan ruuft orer woo te tsukhunft in foer raus saat, mus sicher toot kemacht wëre. Tas folek mus tii ferxmayse mit xteen pis se toot sin. Tëne sayn pluut khomt iwich tëne selepst.’”