Yoohan

17 Yeesus hot tiise tinge kesaat, un tan noom himel kekukt, un kesaat: “Fater, ti xtun is khom. Ferhërlich tayne Soon soo tas tayne Soon tich ferhërlicht, 2 soo wii tuu iim macht kep host iwich ti kanse mënxe, fer tas eyer eewich leepe kepe khan tsu ale woos tuu tëm kept host. 3 Tas petayt tas eewiche leepe: ti layt sole tich, te eensiche woere Kot, khëne lërne, un tee woos tuu kexikt host, Yeesus Kristus. 4 Ich hon tich uf te eyert ferhërlicht un hon fërtich kemacht ti aarwayt woos tuu mich kep host. 5 Un yets, Fater, tuu mich neewich tich loope, mit te hërlichkheet woo ich pay teer hat, eep ti welt eksistiirt hot. 6 “Ich hon tayn naame fer ti mënxe, woos tuu mich fon te welt kep host, pekhant kemacht. Tii waare tayn, un tuu host se mich kep, un tii hon tayn wort aan keheert. 11 “Ich sin net mee uf te welt, awer tii sin uf te welt, un ich keen tsu tich. Haylich Fater, phas tëne uf weeche tayn naame — te naame woos tuu mich kep host — tas tii khene een sin soo wii meyer een sin. 12 Wii ich mit tëne waar, hon ich tii uf kephast weeche tayn naame, te naame woos tuu mich kep host; un ich hon se kexitst, un khee eene fon tëne hot sich ferloer, ploos te soon fon te fernichtung, tas ti Xrifte sich erfiile solte. 14 Ich hon tëne tayn wort kep, awer ti welt tuut se hase, wayl se khee teel fon te welt sin, soo wii ich khee teel fon te welt sin. 15 “Ich tuun net ferlange tas tuu se fon te welt raus nëmst, awer tas tuu se uf phase tuust weeche te Xlechte. 16 Tii sin khee teel fon te welt, soo wii ich khee teel fon te welt sin. 17 Haylich se torich ti woerheet; tayn wort is ti woerheet. 18 Soo wiis tuu mich tsu te welt kexikt host, hon ich aach tii tsu te welt kexikt. 19 Un ich tuun mich fer tii hayliche, tas tii aach kehaylicht wëre torich ti woerheet. 20 “Ich ferlange net ploos weeche tii, awer aach weeche tëne woo, torich tëne sayn wërter, klaape aan mich hon, 21 tas se al khene een sin, soo wiis tuu, Fater, in eenichkheet mit mich pist un ich in eenichkheet mit tich sin, tas se khene aach in eenichkheet mit uns sin, un soo, tuut ti welt klaape tas tuu mich kexikt host. 22 Ich hon tëne ti hërlichkheet kep woos tuu mich kep host, tas tii khene een sin, soo wii meyer een sin. 26 Ich hon tëne tayn naame pekhant kemacht un ich tuun tëm wayter pekhant mache soo tas ti liip woos tuu fer mich host in tëne wërt un aach tas ich eenich mit tëne wëre khan.”