Psalme

26 Say mayn Richter, oo Yeehoowa, wayl ich keen uf tëm weech fon te intekriteet; Ich tuun aan Yeehoowa kans traue, oone tswayfele hon. 2 Unersuuch mich, oo Yeehoowa, un xtel mich unich proop; Mach mayne tiifste ketanke un mayn hërts phuer. 3 Wayl tayne leaale liip is imer foer mich, Un ich keen uf tëm weech fon te woerheet. 4 Ich keen net mit hinerlistiche mëner um Un ich hale mich wech fon tii woo ferxtekele weer se sin. 5 Ich hase keselxaft mit te xlechte mënxe mache Un ich tuun kaar net aan nëme mit te xlechte layt keen. 6 Ich tuun mayn hënt in te unxultichkheet wexe Un ich tuun um tayn altar rom marxiire, oo Yeehoowa, 7 Tas tii anere heere khene wën ich tich mit hart xtim tanke Un tas ich khan tayn kanse wunerliche aktsyoone aus xpreche. 8 Yeehoowa, ich liipe tas haus woos tuu woonst, Tas plats woo tayn hërlichkheet is. 9 Tuu mich net mit te sintiche mënxe fernichte Un nëm net mayn leepe wech mit te mëner woo wyolent sin, 10 tëne sayn hënt sin fol xeemliche aktsyoone Un tëne sayn rechts hant is fol xteeleray. 11 Awer ich, ich tuun uf tëm weech fon te intekriteet keen. Pefray mich un say parmhërtslich mit mich. 12 Mayn fuus is uf een richt pootem; In te kroos kemaynt, tuun ich Yeehoowa loope.