Aphostele sayn Kexicht

14 Un noch: fiile mëner un fraae hon aan kefang am Hër klaape un sich mit tëne samele. 19 Awer, in te nacht, hot Yeehoowa sayn engel ti teere fon te katee uf kemacht. (...) 27 Soo, hon se tii keprung un foer te Sinëtryum kextelt. Tan, hot te hooche priister tëne aus kefroot 28 un hot kesaat: “Meyer hon aych ërnst kexikt net wayter im naame fon tiise man in lërne. Awer, kukt mool! Teyer hot Yeruusalem fol mit ayre inlërnunge kemacht. Un teyer sayt pextimt uns ti xult kepe weeche te toot fon tiise man.” 29 Pheeter un ti anere aphostele hon keantwort: “Mer mise Kot als rechiirente aan heere xtats ti mënxe. 30 Unser foerfatere sayne Kot hot Yeesus fon te toote uf keruuft, tee woo teyer um kepracht hot wii teyer iim aan te phoste kenaachelt hot. 31 Kot hot tee ferhërlicht um sayn rechts sayt wii te Haupste Axënt un Reter, tas Israël sich peroye khan un tas iire sinte fertsayert wëre. 32 Un meyer sin tsayer fon tiise tinge, un soo is aach te hayliche kayst, woo Kot kep hot fer tii woo iim als rechiirer aan heere.” 33 Wii tii tas keheert hon, sin tii wuutich kewoer un wolte se um pringe. 34 Awer Kamalyël, een fariseer, leerer fon tas kesets, keliipt fon te kanse layt, hot sich uf kextelt im Sinëtryum un kexikt ti mëner raus nëme fer een tsayt. 35 Tan hot tee kesaat: “Mëner fon Israël, phast uf mit was teyer mache wolt mit tiise mëner. 36 Tsum payxpiil, een tsayt tsurik hot sich Teutas uf kextelt, als wën eyer een kroose man weyer, un unkefeer 400 mëner hon sich kesamelt mit iim. Awer tee is um kepracht woer, un tii woo mit iim waare sin aus naner kang. Un iire pleen sin net foran kang. 37 Noo tëm, hot sich Yuutas, fon Kalileya, uf kextelt in te taache woo ti layt ketseelt sin woer, un fiil sin tëm noo kang. Tiise man is aach kextorep, un al woo mit iim waare sin aus naner kang. 38 Tan, in tiise situatsyoon, saan ich aych: lost tiise mëner in ruu, lost se keen. Wayl, wën tiise plaan orer aarwayt fon mëner is, tan keet tas net foran; 39 awer wën tas fon Kot is, khent teyer tas net niter mache. Wayl tan, khan sin tas teyer keeche te aychne Kot khëmpfe teet. 40 Tan, hon se sayn aanreet aan kenom. Tii hon kexikt ti aphostele ruufe un hon se ferklopt un tan kesaat tas se solte noo lose in Yeesus sayne naame xpreche. Too, hon se tii keen kelos. 41 Soo, sin se froo aus te Sinëtryum kang, wayl se kuut kenuuch foer Kot waare fer niter kextelt sin weeche Yeesus sayn naame. 42 Un yeete taach, oone noo lose, im thempel un haus tsu haus, hon se wayter in kelërnt un pekhant kemacht ti kuute notisye iwich Yeesus Kristus.