Tyako

1 Fon Tyako, sklaaw fon Kot un fom Hër Yeesus Kristus, fer ti 12 xteme woo uf fiile pletse ferprayt sin: Tas ales kuut mit aych keet! 2 Mayne priiter, wën teyer unerxiitliche proope mit macht, siit tas wii een uersach fer kroos frooheet hon. 3 Wayl teyer wist tas ayre keproopte klaape nëmt tsu persewerans. 4 Awer lost tas ti persewerans sayn aarwayt fërtich pringt, soo tas teyer komplët un in ales oone feeler wërt, un tas niks aych feelt. 5 Tan, wën es kluucheet fer yemant fon aych feelt, sol eyer tii noo un noo fer Kot ferlange un eyer tuut tas kriin, wayl Kot tuut krooshërtslich fer ale kaar kepe, oone se xëne. 6 Awer eyer sol noo un noo mit klaape ferlange, mit khee tswayfel, wayl weer tswayfele hot, is wii een wele fom meer woo te wint hiner un heyer xupt. 7 Yaa, tiise persoon sol net waarte etwas fon Yeehoowa kriin. 8 Tee tswayfelt un is net fest in sayn weeche. 12 Froo is te mënx woo wayter aus halt foer ti proope, wayl, wën eyer ti tsuxtimung kriit, tuut eyer tas kroon fom leepe kriin, woo Yeehoowa ferxproch hot fer tii woo tëm wayter liipe. 13 Nimant sol saan wën eyer keproopt wërt: “Kot is mich am proope.” Wayl, mit xlechte tinge, Kot khan net keproopt wëre un tee proopt aach nimant. 14 Awer yeete eene is keproopt wën eyer fon sayn aychne wunx ketsoo un fersuucht is. 15 Un wën te wunx fruchtpar wërt, pringt tee ti sint uf ti welt; un wën ti sint kemacht is, pringt es te toot. 17 Yeete kuute un perfekte kexenk khomt fon owe, fom Fater fon te himlixe lichte heyer. Eyer ënert sich net wii te xate woo sich treye tuut. 19 Mayn keliipte priiter, halt tas im khop: sayt al xnel fer se heere, awer lamsam fer se xpreche un lamsam fer wuutich kepe; 20 wayl ti wuut fom mënx pringt net Kot sayn kerechtichkheet. 21 Soo lost im xtich ale trek un yeete xtik xlechtichkheet, un nëmt mit tsaamheet aan tas tas wort, woo aych rete khan, wortsle in aych tsiit. 22 Awer, tuut tas wort aan wëne, net ploos horiche; wën net, tuut teyer aych mit falxe aanunge hinerkeen. 23 Wayl wën yemant tas wort horicht, awer es net aan wënt, es is wii eene man woo sayn kesicht im xpiichel kukt: 24 tee kukt sich un, wën eyer faart keet, tuut xon klaych ferkese was fer sort persoon tee is. 25 Awer tee woo mit acht noo kukt tas perfekt kesets, woo frayheet pringt, un sich aan tëm halt, tuut net tas horiche un klaych ferkese, awer tuut ti aarwayt mache; un eyer wërt froo too teweeche. 26 Wën yemant mënt tas eyer Kot aan peete tuut, awer tuut sayn tsung net kontroliire, tan, tuut tee sayn aychne hërts hinerkeen, un sayn aanpeetung hot khee weyert. 27 Ti aat fon aanpeetung woo phuer un oone flek is, tëm noo was unser Kot un Fater tenkt, is tas: tii woo khee eltere hon un ti witfraae in iire xwiirichkheete xitse, un sich oone flek fon te welt hale.