1te Korinter

10 Priiter, ich wil hon tas tëyer wist tas al unsere ferwantere unich ti wolk waare un al sin torich tas meer kang, 2 al sin in Mooses ketaaft këpt, torich ti wolk un tas meer, 3 al hon tas sëlwich kaystliche ësmitel kës 4 un al hon tas sëlwiche kaystliche ketrënk ketrunkt. Wayl tii hon fon tëm kaystlich fels ketrunkt woo tëne noo kang is, un tiise fels hot Kristus representiirt. 5 Awer, Kot hot sich nët fon te mëyeste fon tëne kefrayt, wayl sin im tesërt um keprung këp. 6 Tas ales tiint uns wii payxpiil, tas mer net was xlechtes winxe, soo wii tii es kemacht hon. 7 Meyer sole net itolatrii pratikiire, wii etliche fon tëne kemacht hon, soo wiis kexrip xteet: “Tas folek hot sich kesetst fer se ese un trinke. Un tan, sin se uf kextii fer sich ferkniiche.” 8 Un tuun mer nët sëksuaal imoraaliteet mache, wii ëtliche fon tëne sëksuaal imoraaliteet kemacht hon, ploos fer se fale, 23.000 fon tëne in ploos een taach. 9 Un tuun mer nët Yeehoowa in proop xtële, wii ëtliche fon tëne in proop kextëlt hon, ploos fer torich ti xlange um keprung wëre. 10 Un tuut aych nët peklaae, wii ëtliche fon tëne sich peklaa hon, ploos fer torich te fernichter um keprung wëre. 11 Tiise tinge sin mit tëne pasiirt wii payxpiile un sin kexrip kep wii een aanreet fer uns, fer weem tas ën fon te sisteeme fon tinge xon khom is. 12 Tes weeche, weer tenkt tas eyer uf xteet, mus uf phase fer net fale. 13 Khee fersuuchung is iwer aych khom, woo net keweenlich fer ti kanse mënxe is. Awer Kot is troy, un tee tuut net lose tas teyer mee fersuucht wërt wii teyer aus hale khent. Awer, wën ti fersuuchung khomt, tuut eyer aach een ausweech tsayche tas teyer es aus hale khent. 14 Tës weeche, mayn keliipte, tuun fon te itolatrii aus rayse. 15 Ich xprëche wii fer ferxtëntiche mënxe; tuut aych sëlepst richte was ich saan tuun. 16 Meecht tas khelich klaas fon seechen woo mer seechne tuun, nët een teel aan Kristus sayn pluut sin? Is nët tas proot woo mer keteelt hon een teel aan Kristus sayn khërper? 17 Es këpt ploos een proot, un weeche tas, sin mëyer ploos een khërper, opwool mer fiile sin, wayl mëyer al hon in tëm eensiche proot mit kemacht. 21 Iir khent net trinke fon Yeehoowa sayne khelich un fon te taywele sayne khelich. Iir khent net teel mache aan “Yeehoowa sayne tix” un aan ti taywele sayne tix. 22 Orer tuun mer Yeehoowa ayfersichtich lose? Meechte meyer xtërker sin wii tee? 23 Ales is erlaupt, awer net ales is nutslich. Ales is erlaupt, awer net ales muut uf. 24 Yeete eene sol net ploos aan sayn aychne nuts tenke, awer aan te nuts fon te aner. 31 Tes weeche, ekaal op teyer est, trinkt, orer sonst etwas macht, macht ales fer eer tsu Kot pringe. 32 Sayt khee motiiw fer ti yuute xtolpere mache, aach net fer ti kreeker, un aach net fer Kot sayn kemaynt, 33 soo wii ich am fersuuche sin ale mënxe in ale tinge se kefale, ich suuche net mayn aychne wile mache, awer fon te mëyerste layt sayn, tas se keret wëre.