Apokalipsis

4 Noo tas, hon ich een ufner teer im himel kesiin, un ich hon ti eyerste xtim keheert, wii te thoon fon een trompeet, woo mit mich fertseelt hot; tii hot kesaat: “Khom hiir ruf, un ich tsayche tich ti tinge woo noch pasiire mise.” 2 Noo tas, sin ich unich ti macht fom kayst keplip un ich hon een troon im himel kesiin, un yemant hot ufm troon kehokt. 3 Tee woo ufm troon kehokt hot, hot wii xteen fon jasp un fon sartyo aus kesiin, un um te troon rom, waar een reen poochen woo eenlich wii esmeraalta aus kesiin hot. 4 Es waare 24 troone um te troon rom, un in tiise troone hon ich 24 elteste kesiin woo kehokt hon un woo mit ways tsaych aan ketsoo waare, un uf tëne iire khep waare kroone fon kolt. 5 Fon troon hëyer sin plitse, xtime un tunere khom. Foer tëm troon waare siwe lampe aan — ti hon ti siwe kayste fon Kot representiirt. 6 Foer tëm troon, waar etwas wii tas meer, woo eenlich wii klaas waar, wii kristaal. In te mite fom troon un um tëm rom, waare fier lepeentiche kriatuure, woo fol mit aue, foner un hiner, waare. 7 Ti eyerste lepeentich kriatuer waar eenlich wii een leep, ti tsweete waar eenlich wii een yunge xtiir, ti trite hat een kesicht woo eenlich wii eene man waar, un ti fierte waar eenlich wii een atler am fliie. 8 Yeete eene fon te fier leepeentiche kriatuure hat seks flite, un um tëne rom un unich tëne waare se fol mit aue. Un taach un nacht tuun se saan: “Haylich, haylich, haylich is Yeehoowa Kot, te Ale Mechtiche, woo waar, woo is un woo khomt.” 9 Imer wën ti lepeentiche kriatuure hërlichkheet, eere un tanke kepe fer Tee woo ufm troon hokt, Tee woo fer imer leepe tuut, 10 tuun ti 24 elteste sich pike foer Tëm woo ufm troon sitst; tii loope Tee woo fer imer leept. Tii xmayse sayn kroone foer tëm troon un saan: 11 “Tuu Yeehoowa, unser Kot, fertiinst ti hërlichkheet, ti eer un ti macht, wayls tuu ale tinge kemacht host, un weeche tayn wile tuun se eksistiire un sin se kemacht kep.”