Matheus
7 “Lost noo se richte, tas teyer net kericht wërt. 2 Wayl soo wii teyer ti anere richte tuut, wërt aych kericht; un soo wii teyer ti anere meest, wërt aych kemeest. 3 Warom kukst tuu tas xtroo helmche im au fon tayn pruuter, awer mërkst net tas een paalke in tayn aychne au is? 4 Orer, wii khanst tuu fer tayn pruuter saan: ‘Los mich tas xtroo helmche fon tayn au raus tuun’, wëns tuu een paalke in tayn aychne au host? 5 Tuu falxe mënx! Tuu eyerst te paalke fon tayn aychne au raus tuun un tan khanst tuu richtich siin wiis tuu tas xtroo helmche fom au fon tayn pruuter raus tuust. 6 “Tuut net fer ti hunt kepe was haylich is, un tuut aach net ti phërle fer ti xwayn hin xmayse, tas se nii tas mit te fiis fertreete, un tan se sich rom treye, un aych in xtike rayse. 7 “Tuut wayter ferlange un es wërt fer aych kep; tuut wayter suuche, un teyer tuut es fine; tuut wayter klope, un es wërt fer aych uf kemacht; 8 wayl yeete eene woo ferlangt, kriit; un yeete eene woo suucht, fint; un fer yeete eene woo klopt, wërt es uf kemacht. 12 “Tes weeche, ales was teyer wolt tas ti mënxe fer aych mache solte, solt teyer aach kraat soo fer tëne mache. In woerheet, is es tas was tas Kesets un ti Profeete saan wole. 13 “Keet torich tas kleen toer rin, wayl kroos is tas toer un prayt is te weech woo tsu te fernichtung nëmt, un fiile keen in tiise toer rin. 14 Awer, kleen is tas toer un xmaal is te weech woo tsum leepe nëmt, un weeniche tuun es fine. 15 “Phast uf mit te falxe profeete, woo tsu aych wii xeef ferklayt khome, awer inwënich sin se wii peese wolfe. 16 Weeche tëne sayn friichte tuut teyer se khëne. Meechte mer traupe fon teerne ërnte, orer fayche fon taarne xtek? 17 Kraat soo, tuut yeete kuute paam kuute frucht kepe, awer yeete xlechte paam tuut xlechte frucht kepe. 18 Een kuute paam khan net xlechte frucht kepe, un een faule paam khan kheen kuute frucht kepe. 19 Yeete paam woo net kuute frucht kept, wërt ap kexnit un ins fayer kexmis. 20 Teyer tuut ti mënxe wërklich aan tëne sayn fruchte erkhëne. 21 “Net al woo mich saat: ‘Hër, Hër’, khomt im Raych fom himel rin. Es khomt ploos rin tee woo te wile fon mayn Fater im himel macht. 22 In tëm taach, tuun fiile mich saan: ‘Hër, Hër, hon mer net in tayn naame profetisiirt? Hon mer net temoone in tayn naame aus ketraypt? Un hon mer net fiile wunere in tayn naame kemacht?’ 23 Too, tuun ich tëne saan: ‘Ich hon aych nii mools kekhënt! Keet wech fon mich, teyer woo tas kesets iwertreet!’ 24 “Tës weeche, yeete woo tiise mayne wërter heert un soo macht, tee klaycht sich eene man woo ferxtëntich is, woo sayn haus uf een fëls kepaut hot. 25 Un te reen is kefal, un tas hooch waser is khom un te wint hot keploost un keeche tas haus kexlaa, awer es is nët in keproch, wayl es uf tëm fels kepaut waar. 28 Wii Yeesus fërtich kep is se xpreche, waar tas folek aarich ferwunert mit sayn aat fer in lërne, 29 wayl eyer tii in kelërnt hot wii yemant woo autoriteet hat, un net wii tëne sayn xrayper.