Filiper

4 Tan, mayn liipe priiter, woo ich liipe un woo ich siin wil, mayn frooheet un mayn kroon, halt aych fest im Hër, soo wii ich kesaat hon. 2 Ich reete Ewootya un Sintik aan fer te selwiche ferxtant in eenichkheet mit tëm Hër hon. 3 Un ich ferlange tich aach, mayn woere mitaarwayter, tas tuu wayter tiise fraae helfst. Tii hon sich mit mich weeche ti kuute notisye aan kextrengt, tepay mit Klement un anere fon mayne mitaarwayter, woo sayne naame im puuch fom leepe hon. 4 Frayt aych imer im Hër. Noch mool tuun ich saan: Frayt aych! 5 Al ti mënxe sole tsum wise kriin tas teyer net xtreng sayt. Te Hër is ticht. 6 Tuut weeche niks ëngstlich wëre. Awer, in yeete situatsyoon, ferlangt Kot sayn hilef torich peete, aan hale un tanke; 7 un Kot sayn friit, woo keet iwer ales woo ti mënxe ferxteen khene, tuut ayre hërtse un ketanke torich Yeesus Kristus xitse. 8 Tsum xlus, priiter, tuut imer tenke aan ales was woer is, ales was ërnst is, ales was kerecht is, ales was rayn is, ales was ti liip uf muut, ales was kuut kexproch wërt, ales was kuut is un ales woo loop fertiint. 9 Macht ti tinge woo teyer fon mich kelërnt, kriit un keheert hot un aach was teyer mich kesiin hot se mache, un te Kot fon friit wërt mit aych sin. 10 Ich tuun mich fiil am Hër fraye, tas yets hot tëyer ayre interës iwich mich ferpësert. Opwool tëyer aych ketanke mit mich kemacht hot, hot ti keleechenheet kefeelt fer tas pewayse. 11 Ich tuun tas net saan wayl ich neetichkheet am mit mache sin, wayl ich hon kelërnt in ale situatsyoone tsufriite sin. 12 Ich wees mit weenich un mit fiil leepe. In ales un in yeete situatsyoon hon ich tas kehaymnis kelërnt fer tsufriite sin wën ich sat sin un wën ich hunger hon; wën ich fiil hon un wën ich in noot sin. 13 Fer ales sin ich xtark torich tee woo meer kraft kept. 14 Awer, tëyer hot kuut kemacht wii tëyer mich in mayn petrinkung keholëf hot. 15 Yaa, teyer wist aach, filiper, tas noo tëm, teyer ti kuute otere am eyerste mool keheert hot, wii ich fon Matsetoonya faart kang sin, hot khee kemaynt mich uf kephast in was se tuun hot iwer kepe un kriin, ploos teyer; 16 wayl, wii ich in Tesaloonika waar, hot tëyer tings fer mayne neetichkheete kexikt, nët ploos een mool, awer tswaay. 17 Nët tas ich wil kexënke kriin, awer ich wil te frucht hon woo mee wëyert fer ayre rëchnung pringt. 18 Awer, ich hon ales was ich hon mus, un soo kaar noch mee wii tas. Yets sin ich fersoricht, wayl ich hon tas tings fon Epafrotitus kriit, woo teyer fer mich kexikt hot — een opfer woo aan kenom khan sin, woo een kuute keroch hot fer Kot. 19 Mayne Kot tuut tan ayre kanse neetichkheete fersoriche mit Tëm sayne hërliche raychtum, torich Yeesus Kristus. 20 Fer unser Kot un Fater wërt ti hërlichkheet fer imer un eewich këpt. Amen. 21 Xikt mayne kriise fer yeete hayliche woo in eenichkheet mit Yeesus Kristus* is. Ti priiter woo mit mich sin, tuun kriise fer aych xike. 22 Ale hayliche, eekstra tii fom Sësar sayn haus, tuun kriise fer aych xike. 23 Tas ti unfertiint kuutheet fom Hër Yeesus Kristus say mit tëm kayst woo iir tsayche tuut.