Psalme

126 Wii Yeehoowa ti kefangne tsu Syoon tsurik kepracht hat, Hon mer ketenkt tas tas een traam weyer. 2 In tii tsayt, hot unser munt hart kelacht; Un unser tsung, fon frayt keyukst. In tii tsayt, hon se tswixich ti natsyoone kesaat: “Yeehoowa hot wunerliche tinge fer tëne kemacht.” 3 Yaa, Yeehoowa hot wunerliche tinge fer uns kemacht, Un meyer sin mechtich froo. 4 Los unser kefangne tsurik khome, oo Yeehoowa, Soo wii ti peche tsurik tsu Nekëw laafe. 5 Tii woo mit treene seeye, Wëre mit frooheet ërnte. 6 Tee woo raus keet, aach wën tee prilt, Mit sayn thax fol mit soome, Sicher wërt mit yukse fon frayt tsurik khome, Mit sayn last sereaal.