2te Korinter
2 Ich khëne een man woo in eenichkheet mit Kristus is, woo 14 yoore tsurik - op im khërper, orer raus fom khërper, ich wees net, Kot wees es, is plëtslich tsu tëm trite himel kenom woer. 3 Yaa, ich khëne tiise man — op im khërper, orer aus naner fom khërper, ich wees nët, Kot wees es —, 4 is plëtslich fer tas paratiis kenom woer, un hot wërter keheert woo nët xprëche thërft un woo nët erlaup is fer te man xprëche. 7 ploos wayl ich tiise wunerliche pekhantmachunge kriit hon. Tas ich mich net tsu fiil wichtich fine teete, hon ich een taarn ins flayx kriit, een ëngel fon Satanaas, fer mich wayter haue, tas ich mich net tsu fiil proose teete. 8 Ich hon tray mool fer te Hër aan kehal tas tas sich fon mich wech xafe solt. 9 Awer eyer hot fer mich kesaat: “Mayn unfertiint kuutheet is kenuuch fer tich, wayl mayn macht is in te xwacheet kans ketsaycht.” Soo, mit fiil frooheet, tuun ich mich fon mayn xwacheete proose, tas Kristus sayn macht iwer mich wii een parak plaype tuut. 10 Soo, ich fraye mich wën ich xwacheete, pelaytichunge, nootweenichkheete, yachtunge un xwiirichkheete mit mache, weeche Kristus. Wayl wën ich xwach sin, tan sin ich xtark. 14 Kukt mool, tas is tas 3te mool woo ich fërtich sin fer aych pesuuche un ich wëre net een last fer aych. Wayl ich interesiire mich aan aych, net aan was teyer hot. Sin net ti khiner woo sole fer sayn eltere xpaare, awer ti eltere fer ti khiner. 15 Awer ich, ich wil mich kërn fer aych aus kepe un ich tuun mich fer aych kans aus kepe. Wën ich aych soo fiil liipe, sol ich tan weenicher keliipt wëre?