Psalme

18 Ich liipe tich, oo Yeehoowa, mayn kraft. 2 Yeehoowa is mayne fels, mayn xits plats un tee woo mich fray macht. Mayne Kot is mayne fels, aan weem ich mich ferxtekele; Tee is mayn xuts xilt un mayne mechtiche reter, mayn sicher xits plats. 6 In mayn petrikungs tsayt hon ich Yeehoowa aan keruuft, Ich hon hilef tsu mayn Kot aan kehal. Fon sayn thempel hot eyer mayn xtim keheert, Un mayn aan hale noo hilef hot eyer keheert. 8 Aus sayn naas, is tamp raus khom Un fon sayn munt, een lepeentich fayer; Aus tëm, sin roote khoole khom. 9 Tee hot te himel kepoo un is runer khom. Tike un tunkle wolke waare unich sayn fiis. 10 Tee is uf een kherupiin kefloo khom; Uf te fliter fon een kayst is eyer fiks khom. 16 Fon te heech, hot eyer sayn hant aus kextrekt; Eyer hot mich fest kehal un hot mich fom tiife waser raus ketsoo. 17 Eyer hot mich fon mayn mechtich faynt pefrayt, Fon tii woo mich kehast hon un woo xtërker wii ich waare. 19 Tee hot mich tsu een sicher plats kenom; Tee hot mich pefrayt wayl ich tëm kefalt hon. 22 Tëm sayn kanse kericht ëntxlise sin foer mich; Ich tuun net tëm sayn ëntxlise ap saan. 25 Tuu pist leaal mit tëne woo leaal sin Un tuu pist troy mit tëne woo troy sin. 29 Mit tayn hilef, khan ich keeche een krup xpitspuupe keen; Mit Kot sayn kraft khan ich een mauer ruf kraple. 30 Te weech fom woere Kot is perfekt. Yeehoowa sayn wërter sin rayn. Tee is een xuts xilt fer ale tii woo xuts aan tëm suuche. 32 Te woere Kot is tee woo mich mit kraft aan tsiit, (…) 35 Tuu kepst mich tayn retung xilt; Tayn recht hant tuut mich unerxtitse Un tayn teemuut macht mich kroos. 39 Tuu kepst mich kraft fer te khampf Un machst tas mayn faynte foer mich fale. 46 Yeehoowa leept! Mayn Fels sol keloopt wëre! Te Kot fon mayn retung sol keloopt wëre!