Lukas

2 In tiise taache, hot Sësar Aukustus kexikt tas ti kanse pewooner unich sayn Raych sich in xraype solte. 2 (Tiise eyerste inxraypung is pasiirt wii Kirino te kowernatoer iwer Siirya waar.) 3 Un al sin sich in xraype kang, yeete eene in sayn xtat. 4 Yoosef hot tas aach kemacht. Un kewis, wayl eyer mitkliit fon Tawi sayn haus un familye waar, is eyer fon Kalileya tsu Yuteea ruf kang; fon Nasarë xtat pis te xtat fon Tawi, woo Petleheem kenënt is. 5 Tee is sich mit Maria in xraype kang, woo xon sayn fraa waar un woo teet klaych tas khint kriin. 6 Wii se tat waare, is ti tsayt khom fer Maria tas khint kriin. 7 Un tii hot sayn soon uf te welt keprung, sayn eyerste khint. Tii hot tëm in lumpe um kewikelt un tëm in een fres khump keleet, wayl es waar khee tsimer kewees im plats woo ti pesuucher keplip sin. 8 In te selwich rechyoon, waare es aach xeefer kewees woo traus keleept hon un sayn xeef oomts uf kephast hon. 9 Pletslich is Yeehoowa sayn engel fer tëne tsum foer xayn khom un Yeehoowa sayn hërlichkheet hot um tëne rom kexaynt. Tes weeche, hon se fiil pang kriit. 10 Awer te engel hot tëne kesaat: “Teyer praycht khee pang hon. Wayl ich pringe aych kuute notisye woo tas kanse folek froo lose tuun. 11 Hayt, in Tawi sayn xtat, is een reter fer aych uf te welt khom, woo Kristus, te Hër, is. 12 Soo tuut teyer tëm erkhëne: teyer tuut een nëneche fine in lumpe um kewikelt un tee tuut in een fres khump laye.” 13 Pletslich is een kroose himlixe militeer pay tëm engel tsum foer xayn khom. Tii hon Kot keloopt un kesaat: 14 “Eer fer Kot owe im himel un friit uf te eyert tswixich te mënxe woo tëm kefale.” 15 Wii ti engele tsum himel tsurik kang sin, hon ti xeefer sich naner kesaat: “Meyer mise tsu Petleheem keen fer se siin was pasiirt is, was Yeehoowa uns pekhant kemacht hot.” 16 Tan sin se xnel pis tat hin kang un tii hon Maria un Yoosef un aach tas nëneche kefun, woo uf een fres khump keleet waar. 17 Wii se tas kesiin hon, hon se fertseelt was tëne iwer tas khint kesaat waar. 18 Al woo tas keheert hon, hon sich ferwunert mit was ti xeefer kesaat hon. 19 Awer Maria hot aan kefang tiise kanse wërter in sayn hërts pehale un tii hot tiif too triwer ketenkt. 20 Im weech tsurik, hon ti xeefer loop un eer tsu Kot kep weeche ales was se kesiin un keheert hate. Ales is pasiirt kraat soo wiis tëne kesaat waar. 21 Noo 8 taache, is ti tsayt khom fer te puup pexnayte un tee is Yeesus kenënt kep, te naame woo te engel tëm kep hat eep sayn mama xwanger kep is. 22 Tan, wii ti tsayt khom is fer sich rayn mache — tëm noo Mooses sayn Kesets —, hon Maria un Yoosef Yeesus tsu Yeruusalem kenom, fer tëm foer Yeehoowa pringe, 23 soo wiis xteet in Yeehoowa sayn Kesets: “Yeete eyerste kepoerne soon sol tsu Yeehoowa keheere.” 24 Un tii hon een opfer aan kepoot tëm noo was in Yeehoowa sayn Kesets kexrip is: “Tswaay turtel taupe orer tswaay yunge taupe.” 25 In Yeruusalem, waar es eene kerechte man woo Simeoon keheest hot. Tee hot Kot mit sayn kans hërts ketiint un hot kewaart tas Israël ketreest weyer. Hayliche kayst waar iwer tëm kewees. 26 Kot hot aach, torich te hayliche kayst, tëm ketsaycht tas eyer net xtërpe teet foer Yeehoowa sayn Kristus siin. 27 Soo, unich te kraft fom kayst, is eyer tsum thempel kang. Un wii ti eltere mit tëm kleene Yeesus khom sin fer se mache was tas Kesets kesaat hot, 28 hot eyer tas khint uf sayn aarme kehool. Tee hot Kot keloopt un kesaat: 29 “Soweraan Hër, yets khan tayn sklaaw in friit xtërpe, soo wiis tuu kesaat hast. 30 Wayl mayn aue hon kesiin tee woos tuu penutse tuust fer retung pringe, 31 tee woos tuu kexikt host un woo ale folke siin khene: 32 een licht fer tas xlaye fon te natsyoone wech nëme un een eer fer tayn folek Israël.” 33 Te papa un ti mama hon sich ferwunert weeche ales was tëne kesaat waar iwich te puup. 34 Simeoon hot se keseechent un hot tsu Maria, ti mama, kesaat: “Horich mool, weeche tiise khint, tuun fiile in Israël fale un sich uf xtele. Tee wërt een sinaal sin woo ti layt tekeeche xpreche tuun; 35 soo, tuun fiile tsayche weer se wërklich sin. Un een lange xwaart tuut tayn seel torich xteche.” 36 Es waar aach tat een profeetin woo Ana keheest hot, tochter fon Fanuël, fon Asër sayn xtam. Tii waar xon alt kewees; noo sayn hayrat, hat se 7 yoore mit sayn man keleept. 37 Tii waar een witfraa un waar 84 yoore alt. Tii waar imer im thempel kewees un hot hayliche tiinst taach un nacht kemacht; tii hot kefast un ërnst tsu Kot kepeet. 38 In te selwich xtun, is se tichter pay tëne khom un hot aan kefang Kot tanke un iwer tas khint xpreche fer al woo Yeruusalem sayn pefrayung kewaart hon. 39 Noo tas se ales kemacht hon was Yeehoowa sayn Kesets kesaat hot, sin se tsurik tsu Kalileya kang, tsu sayn xtat, Nasarë. 40 Tas khint is yeete taach kreeser, xtërker un kluucher kep un Kot hot sich mit tëm kefalt. 41 Yeesus sayn eltere waare keweent yeetes yoer tsum Oostre fest in Yeruusalem keen. 42 Wii Yeesus 12 yoore alt waar, sin se tsum fest in Yeruusalem ruf kang, soo wii se keweent waare. 43 Wii tas fest tsum ën khom is, hon se aan kefang tsurik hëm keen. Awer tii hon net kemërkt tas Yeesus in Yeruusalem keplip is. 44 Tii hon kerechent tas eyer paym krup waar woo mitsamer am reese waar. Tes weeche, hon se een kanse taach kereest eep se aan kefang hon tëm suuche pay te parente un anere layt woo se kekhënt hon. 45 Awer, wayl se tëm net kefun hon, sin se tsurik tsu Yeruusalem kang un hon tëm iweraal kesuucht. 46 Tsum xlus, noo 3 taache, hon se tëm im thempel kefun. Tee waar in te mite fon te leerer kesitst. Tee hot se kehoricht un frooche kemacht. 47 Al woo tëm keheert hon, hon sich ferwunert mit sayn ferxtëntnis un sayn antworte. 48 Wii sayn eltere tëm kesiin hon, hon se sich ferwunert. Un sayn mama hot tëm kesaat: “Soon, warom host tuu tas mit uns kemacht? Kuk mool, ich un tayn papa sin ëngstlich kep un meyer hon tich iweraal kesuucht.” 49 Awer tee hot tëne kesaat: “Warom hot teyer mich kesuucht? Wust teyer net tas ich must in mayn Fater sayn haus sin?” 50 Awer tii hon net ferxtan was eyer saan wolt. 51 Soo is eyer mit tëne tsurik tsu Nasarë runer kang. Tee hot wayter sayn eltere aan keheert. Un sayn mama hot tiise wërter al tiif im hërts pehal. 52 Yeesus is imer kreeser un kluucher kep, un tee waar imer peser foer Kot un ti mënxe aan kesiin.