Ëfeser
4 Tan, ich, woo weeche tëm Hër in kexpërt sin, hale ich aych aan tas teyer een kexayt leepe nëmt fer tas woo teyer keruuft kep sayt, 2 mit kans teemuut, tsaamheet un ketult, tuut wayter eene ti anere in liip aus hale, 3 un aych ërnst aan xtrenge fer ti eenichkheet fom kayst hale, torich ti ferpiinung fom friit. 4 Es kept ploos een khërper un ploos een kayst, soo wii es ploos een hofnung kept woo teyer keruuft kep sayt; 5 es kept ploos een Hër, ploos een klaape, ploos een taaf; 6 es kept ploos een Kot un Fater fon ale kaar, woo iwer ale is, un woo torich ale un in ale xaft. 7 Yeete eene fon uns hot unfertiint kuutheet kriit tëm noo wii Yeesus tiise kexenk keteelt hot. 8 Wayl ti Xrifte saan: “Wii eyer in te heech ruf kang is, hot eyer kefangne mit sich kenom. Eyer hot mëner wii kexenke kep.” 11 Un tee hot etliche wii aphostele kep, etliche wii profeete, etliche wii preeticher, etliche wii xeefer un leerer. 12 Tee hot se fersoricht fer ti hayliche korikiire, fer ti anere tiine un fer Kristus sayn khërper uf paue. 13 Soo, wëre meyer al eenich in unser klaape un in unser kenaue khëntnis fon Kot sayn Soon. Tan, wëre meyer rayfe mënxe un khome meyer aan Kristus sayn kaystlich heech. 14 Soo meyer sole net mee khiner sin, woo ti weele hin un heyer xupe un woo fon yeete inlërnung wint hin un heyer kenom sin, weeche ti mënxe woo fale penutse un anere mit falxheet hinerkeen. 15 Awer wole mer ti woerheet saan un, torich liip, in ales wakse unich Kristus, woo te khop is. 16 Torich tee, sin ti kanse khërper teele harmoonix fereenicht un tuun mitsamer xafe weeche ti kelenke woo unerxtitsung kepe. Wën yeete khërper teel sayn aarwayt richtich macht, tas heleft tas te khërper wakst un sich in liip uf paut. 17 Tës weeche, tuun ich saan un aych een xtarëk aan reet këpe am Hër: tuut nët mee keen wii ti layt fon te natsioone keen, aan ketanke woo khee wëyert hon. 18 Sayn ferxtant is in tunkelheet un tii sin wayt wech fon tëm leepe woo tsu Kot keheert, wayl tii hon khee kluucheet un sayn hërts is hart kep. 19 Tii khimere sich net mee mit was richtich un ferkheert is. Tes weeche tuun se sich xeemlich aan xtele un tuun ale sorte unrayne tings mit kiirichkheet pratikiire. 20 Awer tëyer hot nët kelërnt tas Kristus soo is, 21 wën tëyer wërklich tee aan keheert hot un fon tëm in kelërnt sayt, torich ti woerheet woo in Yeesus is. 22 Teyer sayt in kelërnt kep tas teyer solt ti alt personaliteet neewe lose, woo xtimt mit was teyer foer heyer kemacht hot, un woo xlecht petrof is torich sayn hinerlistiche winxe. 23 Tuut wayter ti aat wii teyer tenkt, nay mache 24 un tuut aych mit te nay personaliteet aan tsiie, woo tëm noo Kot sayn wile kemacht kep is, in woere kerechtichkheet un leaaliteet. 25 Tes weeche, wayl teyer ti liieray neewe kelos hot, xprecht ti woerheet eene mim anere, wayl meyer sin mitkliiter woo eene tsum aner keheere. 26 Kept wuutich, awer tuut net sinte; ti sun sol net uner keen soo lang wii teyer noch wuutich sayt; 27 kept khee xans fer te Taywel. 28 Weer xteelt, sol net mee xteele; uf aner sayt, xaft fiil, macht mit ayre hënt een kuut aarwayt, tas teyer etwas hot fer aus teele mit yemant woo in neetichkheet is. 29 Khee xlecht wort sol aus ayre munt khome. Awer, ales was teyer saat, sol ti anere uf muute, tëm noo was neetich is. Soo, khent teyer nutse pringe fer tii woo aych heere. 30 Un tuut nët Kot sayne hayliche kayst traurich lose, fon weem tëyer ti marke kriit hot fer eene taach fon frayheet torich tas fray khaaf opfer. 31 Lost im xtich ale sorte piter xpiirunge, peesheet, wuut, xraayeray un wërter woo xaate mache, un aach ti kans xlechtichkheet. 32 Awer sayt kuut eene mit te anere, hërtslich mitlaytich, fertsayt aych krooshërtslich, soo wii Kot torich Kristus aych krooshërtslich fertsayt hot.