Matheus

6 “Phast uf fer net tas kerechtes foer ti anere mache ploos tas se aych siin. Wayl, wën teyer tas macht, kriit teyer khee peloonung fon ayre Fater woo im himel is. 2 Wëns tuu tëm aarm etwas kepst, ploos net te trompeet foer tich, soo wii ti ferxtelner in ti sinakooke tas mache, wayl se wole keloop wëre foer ti mënxe. Ich saan aych ti woerheet: Tii sin xon peloont kewoer. 3 Awer wëns tuu fer een aarm etwas kepst, los net tayn links hant wise was ti rechts hant macht, 4 soo was tuu kepst, wërt in kehaymnis sin. Tan tayn Fater, woo in kehaymnis ales siit, tuut tich peloone. 5 Aach, wën teyer peete tuut, sayt net wii tii ferxteltner, woo sich kërn in te sinakooke hin xtele un in te haupste krayts weeche fer se peete, tas ti layt se siin. Ich saan aych ti woerheet: Tii hon xon sayn kans peloonung. 6 Awer wëns tuu peete tuust, kee in tayn ekstra tsimer, un mach ti teer tsu, peet fer tayn fater woo ferxtekelt is. Un tan tayn fater woo fon tëm ferxtekelt plats kuke tuut, tuut tich peloone. 7 Wëns tuu peetst, saa net imer ti selwiche tinge noo un noo, soo wii ti layt fon te natsyoone es mache, wayl se tenke tas se aan keheert wëre wayl se fiile wërter penutse. 8 Sayt net soo wii tëne. Wayl ayre Fater wees xon was teyer praycht eep teyer es tëm ferlangt. 9 “Tes weeche, mist teyer soo peete: “‘Unser Fater im himel, tayn naame sol kehaylicht wëre. 10 Tayn Raych sol khome. Tayn wile sol kemacht wëre, wii im himel, soo aach uf te eyert. 11 Kep uns hayt unser proot fer tiise taach, 12 un fertsay unsere xulte, soo wii meyer aach fertsaye tii woo uns xultich sin. 13 Un pring uns net in fersuuchung, awer mach uns fom Xlechter fray.’ 14 “Wayl, wën teyer ti anere sayn feeler fertsayt, tuut ayre Fater im himel aych aach fertsaye. 15 Awer wën teyer net ti anere sayn feeler fertsayt, tuut ayre Fater aych aach net fertsaye. 19 Tuut noo lose fer aych xatse uf te eyert samele, woo ti fixelche un te rost es fersaue, un woo ti xpitspuupe in preche un xteele. 20 Xtats tas, tuut fer aych xatse im himel samele, woo ti fixelche un te rost niks fersaue, un woo ti xpitspuupe net in preche un net xteele. 21 Wayl woo tayn xats xteet, kraat tat wërt aach tayn hërts xteen. 22 “Ti lamp fom khërper is tas au. Tan, wën tayn au ploos tsu eene phunkt kukt, is tayn kanse khërper fol licht. 23 Awer, wën tayn au naytich is, wërt tayn kanse khërper tunkel. Wën tas licht woo in tich is in woerheet tunkelheet is, wii kroos is tiise tunkelheet! 24 “Nimant khan sklaaw fon tswaay hëre sin; wayl tee wërt eene fon tëne hase un te anere liipe, orer tee tuut mit eene hale un mim anere wil tee niks se tuun hon. Teyer khent net sklaawe fon Kot un fom Raychtum sin. 25 “Tes weeche, saan ich aych: Lost noo aych soo fiil ketanke iwer ayre leepe mache, iwer was teyer ese orer trinke solt, un iwer ayre khërper, was teyer aan tsiie solt. Is tas leepe net wichticher wii tas ese un te khërper wichticher wii tas tsaych? 26 Kukt mit acht ti feechel im himel; tii tuun net seeye un net ërnte, un tuun net in xope samele, awer ayre Fater, woo im himel is, fersoricht se. Meecht teyer net mee weyert hon wii tii? 27 Weer fon aych, woo sich ketanke macht, khan sayn leepe noore een xtun lënger lose? 28 Un aach, warom tuut teyer weeche ti tsaych ëngstlich plaype? Lërnt een lisyoon fon ti lilye, wii tii ufm khamp wakse. Tii mache sich khee mii un tuun niks fleechte. 29 Awer ich saan aych tas noch net mool Salomon waar in sayn hërlichkeet soo xeen aan ketsoo, wii eene fon tëne. 30 Tan, wën Kot tuut soo aan tsiie ti planse fom khamp, woo hayt too hiir sin un moye sin in te oowe kexmis, tuut eyer net aych noch sicher aan tsiie, mënxe mit weeniche klaape? 31 Tes weeche, wërt nii ëngstlich, un saat: ‘Was tuun mer ese?’ orer: ‘Was tuun mer trinke?’ orer: ‘Was tuun mer aan tsiie?’ 32 Weeche tas ales tuun ti natsyoone sich aarich aan xtrenge. Ayre himlixe Fater wees tas teyer tas ales praycht. 33 Soo tuut wayter eyerst Kot sayn Raych un sayn kerechtichkheet suuche un tan ale tiise anere tinge wëre aych kep. 34 Soo, kept nii ëngstlich weeche te neekste taach, wayl te neekste taach hot sayn aychne soriche. Yeete taach pringt kenuuch xwiirichkheete mit sich.