Psalme

31 Oo Yeehoowa, pay tich hon ich xuts kesuucht. Tas ich nii mools ferxeemt wëre. Pefray mich, wayl tuu kerecht pist. 2 Mach tayn oer fer mich xpits. Khom xnel fer mich pefraye! Say fer mich een xits plats in te përiche, Een pefestichungs plats fer mich rete. 3 Wayl tuu pist mayn fels un mayn xits plats; Weeche tayn naame, tuust tuu mich fiire un lënke. 4 Tuu tuust mich fray mache fom weep woo se heelich keleet hon fer mich fange, Wayl tuu pist mayn xits plats. 5 In tayn hënt fertraue ich mayn kayst. Tuu host mich keret, oo Yeehoowa, Kot fon te woerheet. 6 Ich hase tii woo sich foer unutsliche keeter, woo khee weyert hon, pike; Awer ich tuun uf Yeehoowa traue. 7 Ich tuun mich mit tayn leaale liip fiil fraye, Wayl tuu siist mayn xwiirichkheet; Tuu khënst mayn tiif ëngstlichkheet. 8 Tuu host mich net in te faynte sayn hënt ap kep, Awer tuu host mich uf een sicher plats ketuun. 9 Xenk mich tayn kefale, oo Yeehoowa, wayl ich in kroos xwiirichkheet sin. Ti ëngstlichkheet hot mayne aue un aach mayn kanse khërper xwach kelos. 10 Mayn leepe tuut in traurichkheet uner keen, Un mayne yoore sin fol yaamare. Mayn kraft tuut weeche mayn feeler ferxwiine; Mayne knoche wëre xwach. 11 Al mayne keechner tuun mich ferxpote, Hauptseechlich mayne nochpoore. Un mayne pekhante hon pang fon mich; Wën se mich uf een puuplix plats siin, tuun se fon mich aus rayse. 12 Tii hon mich fon tëne sayn hërts raus kenom un hon mich ferkes, wii wën ich toot weyer. Ich sin wii een ferprochne kruuch. 13 Ich hon keheert xlechte tinge woo net woer sin woo fiile saan; Pang is um mich rom. Wën se sich keeche mich fersamele, Pleene se mayn leepe wech xafe. 14 Awer ich traue uf tich, oo Yeehoowa. Ich saan: “Tuu pist mayn Kot.” 15 Mayn taache sin in tayn hënt. Pefray mich fon te hënt fon mayn faynte un fon tii woo mich yachte. 16 Los tayn kesicht iwich tayn tiiner xayne. Tuu mich rete in tayn leaal liip. 17 Oo Yeehoowa, los net tas ich ferxeemt wëre wën ich tich aan ruufe. Tas ti xlechte ferxeemt wëre sole; Tas se im Kraap ruych wëre sole. 18 Tas ti lipe fon te liichner tsu kemacht wëre sole, Lipe woo keeche te kerechter xpreche in een hoochmuutich un ausferxeemt aat. 19 Wii kroos is tayn kuutheet! Tuu host se pehal fer tii woo tiif respëkt tsu tich hon, Un tuu tsaychst se foer ale mënxe, tii pay tich xitsung suuche. 20 In tëm kehaym plats fon tayn presëns, tuust tuu tii ferxtekele Fon te xlechte pleen fon te mënxe; In tayn ferxtekelt plats, tuust tuu se xitse Fon te xlechte wërter. 21 Keloopt say Yeehoowa, Wayl, in een wunerlich aat, hot eyer mich leaale liip ketsaycht in een xtat woo te faynt sayn militeer um ketsaunt hot. 22 Toch ich, ich sin ausensich kep un hon kesaat: “Ich wëre foer tich um keprung.” Awer tuu host mayn aan hale keheert wii ich tich noo hilef aan keruuf hon. 23 Liipt Yeehoowa, teyer al woo tsu tëm leaal sayt! Yeehoowa xitst ti troye, Awer Eyer tuut tee woo hoochmuutich is tsurik petsaale tëm noo was tee fertiint. 24 Sayt koraajich, un tas ayer hërts xtark is, Teyer al woo uf Yeehoowa hoft.