Isayas
11 (…) Awer iir sayt tii woo Yeehoowa im xtich kelos hot (...) woo te tix in richte tuun fer te kot fom klik,(…) 12 (...) Teyer hot foran kemacht was foer mayn aue xlecht is, un hot raus kesuucht tas tings woo mich net kefal hot. 13 Tes weeche, soo saat te Soweraan Hër Yeehoowa: “Kukt! Mayne tiiner tuun ese, awer teyer tuut hungernoot mit mache. Mayne tiiner tuun trinke, awer teyer tuut torst mit mache. Mayne tiiner tuun sich fraye, awer teyer tuut xaam mit mache. 14 Mayne tiiner tuun yukse fon frayt wayl sayne hërts sich kuut xpiirt, awer teyer tuut xraaye wayl ayre hërts phayn xpiirt un tuut prile wayl ayre kayst ferproch is. 16 Soo tas yeete eene uf te eyert woo een seechen fer sich selepst suucht Wërt fon te Kot fon te woerheet keseechent. Un yeete eene uf te eyert woo een ferxpreche macht, Tuut torich te Kot fon te woerheet ferxpreche. Wayl ti kanse traurichkheete fon te ferkangne yoore wëre ferkes; Tii wëre fon mayn aue ferxtekelt. 17 Kukt! Ich mache naye himel un een nay eyert; Un ti ferkangne tinge wëre net mee erinert un tuun net mee ins hërts khome. 18 Tes weeche, frayt aych un sayt imer froo weeche was ich am mache sin. Wayl kuk mool! Ich tuun Yeruusalem mache wii een uersach fer sich fraye Un sayn folek, wii een uersach fer froo sin. 19 Ich tuun mich mit Yeruusalem fraye un froo wëre weeche mayn folek. Tat, tuut ma net mee heere yemant am prile orer unruych am krayxe.” 20 “Tat, es wërt khee nëneche woo ploos phaar taache leepe tuut Orer elter layt woo net sayn kanse yoore leepe tuun. Wayl weer mit 100 yoore xtërpe tuut, wërt wii yung aan kesiin Un te sinter wërt ferfluucht, aach wën eyer 100 yoore alt is. 21 Tii tuun hayser paue un in tëne woone; Un tuun traupe kriste plantse un tëne sayn friichte ese. 22 Tii tuun net paue fer anere trin woone, Un aach net plantse fer anere ese. Wayl ti taache fon mayn folek wëre wii ti taache fon een paam sin, Un mayn rauskesuuchtner tuun ti aarwayt fon sayn aychne hënt kans aus nutse. 23 Tii tuun net umsonst xweyer xafe, Tii tuun aach net khiner uf te welt pringe fer eelent se layte, Wayl tii un tëne sayn khiner Sin ti nookhomer woo fon Yeehoowa keseechent sin. 24 Soo kaar eep se aan hale, tuun ich antworte. Wën se noch am xpreche sin, tuun ich heere. 25 Te wolf un tas lam tuun mitsamer futer frese; Te leep tuut wii te xtiier xtroo frese Un te xlang tuut xtaap frese. Uf mayn kanse hayliche përich tuun se khee xaate un khee fernichtung mache”, saat Yeehoowa.