Markus
2 Etliche fariseer sin khom un, wolte tëm im proop xtele, hon kefroot eps erlaupt is tas een man sich tiworsiirt fon te fraa. 3 Eyer hot tëne keantwort: ”Was hot Mooses aych kexikt?” 4 Tii hon kesaat: ”Mooses hot erlaupt tas te man een tiwors tsertifikaat xraype teet un se faart xike teet.” 5 Awer Yeesus hot fer tëne kesaat: “Es is weeche ayre harte hërtse tas eyer tas kepoot fer aych kexrip hot. 6 Awer, am aanfang fon te kriatsyoon ’Hot Eyer tii man un fraa kemacht. 7 Tes weeche tuut te man sayn fater un sayn muter lose, 8 un ti tswaay wëre ploos een flayx’, soo sin se net mee tswaay, awer ploos een flayx. 9 Tes weeche, was Kot unich tas selwiche yoch ketuun hot, sol te mënx net aus naner mache. 10 Wii se noch mool ins haus waare, hon ti tisipele iwich tas kefroot. 11 Tee hot tëne kesaat: “Weer sich tiworsiirt fon sayn fraa un hayrat mit een aner, xtelt sich in atultëryo keeche tii, 12 un wën een fraa, noo se sich fon sayn man tiworsiirt hot, sich hayrat mit een aner, tuut aach atultëryo mache.” 13 Ti layt hon tan aan kefang ti khinerche tsu tëm nëme tas eyer tëne seechne solt, awer ti tisipele hon se kexteert. 14 Wii Yeesus tas kesiin hot, is eyer pees kep un hot fer tii kesaat: “Lost ti khinerche tsu meer khome. Fersuucht se net um hale, wayl Kot sayn Raych keheert ti layt woo wii tii sin. 15 Ich saan aych ti woerheet: Weer net Kot sayn Raych wii een khintche aan nëmt, tuut sicher net tat rin keen.” 16 Tan, hot eyer ti khiner in sayne aarme kenom un hot aan kefang sayn hënt uf tëne tuun, fer tëne seechne. 17 Wii eyer am raus keen waar, is eene man tsu tëm kexprung un hot sich foer tëm kekniit un tëm kefroot: “Kuute Leerer, was mus ich mache fer tas eewiche leepe ërpe?” 18 Yeesus hot tëm kesaat: “Warom nënst tuu mich kuut? Nimant is kuut, ploos eene: Kot. 19 Tuu khënst ti kepoote: ‘Tuu net um pringe; tuu net sëks aus ti hayrat mache; tuu net xteele; tuu net falx tsayung kepe; tuu net hinerkeen; eer tayne fater un tayn muter.’” 20 Te man hot tëm kesaat: “Leerer, fon yung aan tuun ich tas ales aan heere.” 21 Yeesus hot tëm aan kekukt un liip tsu tëm kexpiirt un kesaat: “Een tings tuut tich noch feele: kee un ferkhaaf was tuu host un kep tas kelt fer ti aarme; soo tuust tuu een xats im himel hon; un khom, kee mich noo.” 22 Awer te man is oone muut mit tiise antwort kep un is traurich faart kang, wayl tee fiile tinge hat. 23 Noo Yeesus um sich rom kekukt hot, hot eyer fer sayn tisipele kesaat: “Tas wërt xlim sin, fer ti rayche layt in Kot sayn raych rin khome!” 29 Yeesus hot kesaat: “Ich saan aych mit kans sicherheet: nimant hot sayn haus, priiter, xwestere, muter, fater, khiner orer khëmp hiner kelos — weeche mich un weeche ti kuute notisye —, 30 woo net yets kriit, in tiise tsayt, 100 mool mee hayser, priiter, xwestere, muter, khiner un khëmp — unich yachtung — un, im sisteem woo noch khomt, tas eewiches leepe. 35 Tyako un Yohan, soone fon Sepeteu, sin tich pay tëm kang un hon kesaat: “Leerer, meyer wole tas tuu fer uns machst was mer tich ferlange.” 36 Eyer hot tëne kefroot: “Was wolt teyer tas ich fer aych mache sol?” 37 Tii hon keantwort: “Los uns, eene uf tayne rechtes sayt un te aner uf tayne linkse sayt, sich setse, in tayn hërlichkheet. 40 Awer, ich thërfe net ëntxlise weer sich aan mayn rechts orer links sayt setst; . . . 43 Es sol net soo mit aych sin. Awer weer wil kroos tswixich aych sin, mus ti anere tiine; 44 un weer wil te eyerste tswixich aych sin, mus sklaaw fon al ti anere sin. 45 Wayl soo kaar te Soon fom Mënx is net khom fer ketiint wëre, awer fer ti anere tiine un sayn leepe wii een fray khaaf opfer fer fiile layt kepe. 47 Wii tee keheert hot tas es Yeesus, te Nasareener waar, hot eyer aan kefang se ruufe: “Yeesus, Tawi sayn Soon, say parmhërtslich mit meer!” 50 Tee hot sayn mantel neewe kexmis, is xnel uf kextii un Yeesus in keeche kang. 51 Tan hot Yeesus tëm kefroot: “Was wilst tuu tas ich fer tich mache sol?” Te plinter hot fer tem kesaat: “Raponi, helef mich tas ich noch mool siin khan”. 52 Un Yeesus hot tëm kesaat: “Kee, tayn klaape hot tich kesunt kemacht.” In te selwich tsayt hot eyer aan kefang se siin un is Yeesus im xtroos noo kang.