Matheus
4 Tan hot te kayst Yeesus tsum tesërt kelenkt, woo eyer fom Taywel fersuucht wëre solt. 2 Noo 40 taache un 40 nachte faste, hat eyer hunger. 3 Too is te Fersuucher khom un hot tëm kesaat: “Wëns tuu Kot sayn soon pist, xik tiise xteen proot wëre.” 4 Awer Yeesus hot keantwort: “Es xteet in te Xrifte: ‘Te mënx sol net ploos fon proot leepe, awer fon yeete wort woo fon Yeehoowa sayn munt khomt.’ ” 5 Tan hot te Taywel tëm tsu te haylich xtat kenom un hot tëm ufm heechste plats fom thempel kextelt. 6 Un tee hot kesaat: “Wëns tuu Kot sayn soon pist, xmays tich runer, wayl es xteet in te Xrifte: ‘Tee xikt sayn engele tich xitse’ un ‘Uf sayn hënt, tuun se tich traan tas tuu net tayn fuus aan een xteen xlaast’.” 7 Yeesus hot keantwort: “Es xteet aach in te Xrifte: ‘Tuu solst net tayn Kot Yeehoowa unich proop xtele.’ ” 8 Tan hot te Taywel tëm tsu een mechtich hooch përich kenom un hot tëm ti kanse rayche fon te welt un sayn hërlichkheet ketsaycht. 9 Un hot tëm kesaat: “Ich kepe tich tas ales, wëns tuu mich een mool aan peete tuust.” 10 Yeesus hot tan keantwort: “Kee wech, Satanaas! Wayl es xteet in te Xrifte: ‘Tuu solst Yeehoowa tayn Kot aan peete un ploos tëm tiine.’ ” 11 Soo hot te Taywel tëm kelos un ti engele sin Yeesus tiine khom. 12 Wii eyer tsum wise kriit hot tas Yoohan in kexpërt kep is, is eyer tsu Kalileya kang. 13 Noo tas eyer Nasarë kelos hot, is eyer in Kafarnaum woone kang, ticht paym meer, in te rechyoone fon Sepuloon un Naftalii. 14 Soo hon ti wërter fom profeet Isayas sich erfiilt: 15 “Oo lant fon Sepuloon un lant fon Naftalii, Kalileya fon te anere folke, woo im weech langst tas meer xteet, uf te aner sayt fom Yortan flus! 16 Tas folek, woo in te tunkelheet kesitst waar, hot een kroose licht kesiin. Een licht hot kexaynt iwer tii woo kesitst waare in een lant unich te xate fom toot.” 17 Fon tiise tsayt aan wayter, hot Yeesus aan kefang se preetiche un se saan: “Peroyt aych, wayl tas himlixe Raych ticht is.” 18 Wën tee newich tas meer fon Kalilëya am laafe waar, hot eyer tswaay priiter kesiin ti netse aans meer xmayse, wayl se fixer waare. Eene waar Simon, woo waar wii Pheeter keruuft, un te aner waar sayn pruuter Antrë. 19 Un tee hot tëne kesaat: “Keet mich noo un ich mache tas teyer fixer fon mënxe wërt.” 20 Tii hon klaych ti netse hiner kelos un sin tëm noo kang. 21 Een pisye forem, hot eyer tswaay anere priiter kesiin: Tyako — Sepeteu sayn soon — un sayn pruuter Yoohan. Tii waare mit sayn fater in tëm xif, ti netse am flike. Yeesus hot tëne keruuft 22 un tii hon klaych tas xif un sayn fater hiner kelos, un sin tëm noo kang. 23 Tan, is eyer torich ti kans Kalileya kang un hot in tëne sayn sinakooke in kelërnt. Tee hot ti kuute notisye fon Kot sayn Raych kepreeticht un hot yeete sort krankheet un xmërts fom folek keheelt.