Xeenesis

1 Am aanfang hot Kot te himel un ti eyert kemacht. 2 Ti eyert waar oone form un leye, un iwer tas tiife waser waars tunkel; un Kot sayn aktiiw kraft hot sich iwer tas waser keweekelt. 3 Un Kot hot kesaat: “Es sol licht xayne.” Tan, is licht kemacht kep. 4 Nochter, hot Kot kesiin tas tas licht kuut waar, un Kot hot aan kefang tas licht fon te tunkelheet aus naner mache. 5 Kot hot tas licht “taach” kenënt, awer ti tunkelheet hot eyer “nacht” kenënt. Es is oomt un moynt kep, eyerste taach. 6 Tan, hot Kot kesaat: “Tas een atmosfëre tswixich tas waser kept, un tas een teelung tswixich waser un waser kept.” 7 Tan, hot Kot ti atmosfëre kemacht un hot tas waser woo uner ti atmosfëre waar un tas waser woo oowe ti atmosfëre waar, keteelt. Un soo waars. 8 Kot hot ti atmosfëre “himel” kenënt. Es is oomt un moynt kep, tsweete taach. 9 Tan, hot Kot kesaat: “Tas tas waser woo uner tëm himel is, ploos in een plats sich samele tuut, un tas trokne lant sol tsum foer xayn khome.” Un soo waars. 10 Kot hot tas trokne lant “eyert” kenënt, awer tas waser woo kesamelt kep is, hot eyer “meer” kenënt. Un Kot hot kesiin tas es kuut waar. 11 Tan, hot Kot kesaat: “Ti eyert sol kraas wakse mache, aach plantse woo soome kepe un oopst peem tëm noo sayne sorte, woo friichte mit soome kepe.” Un soo waars. 12 Aus ti eyert is tas kraas khom un plantse woo soome kep hon un peem woo friichte mit soome kep hon, noo sayn sorte. Kot hot tan kesiin tas es kuut waar. 13 Es is oomt un moynt kep, trite taach. 14 Tan, hot Kot kesaat: “Tas licht sol in te atmosfëre fom himel xayne, tas een teelung tswixich te taach un ti nacht kept, un tii sole tsayte, taache un yoore hin tsayche. 15 Tii sole wii lichte in te atmosfëre fom himel uf te eyert xayne.” Un soo waars. 16 Un Kot hot ti tswaay kroose lichte kemacht, tas kreeste licht fer im taach xayne un tas kleenste licht fer in te nacht xayne, un aach ti xtërne. 17 Soo, hot Kot tii in te atmosfëre fom himel ketuun fer uf te eyert xayne, 18 tas se taach un nacht xayne sole un fer een teelung tswixich tas licht un ti tunkelheet mache. Kot hot tan kesiin tas es kuut waar. 19 Es is oomt un moynt kep, fierte taach. 20 Tan hot Kot kesaat: “Tas waser sol fol mit lepeentiche kriatuure wëre, un ti fliiente tiere sole iwer ti eyert, im himel fliie.” 21 Un Kot hot ti kroose tiere fom meer kemacht un ale lepeentiche kriatuure woo sich weekele un fiil im waser sin, noo sayn sorte, un ale kriatuure woo fliter hon un woo fliie khëne, noo sayn sorte. Un Kot hot kesiin tas es kuut waar. 24 Tan hot Kot kesaat: “Ti eyert sol lepeentiche kriatuure, noo tëne sayn sorte, pringe: haus fii, tier woo sich xlept un wilt tier fon te eyert, noo tëne sayn sorte.” Un soo waars. 25 Kot hot ti wilte tiere fon ti Eyert kemacht, noo sayn sorte, un tas haus fii noo sayn sorte un ti kanse tiere woo sich xlepe noo sayn sorte. Un Kot hot kesiin tas es kuut waar. 26 Tan, hot Kot kesaat: “Wole mer te mënx mache noo unser pilt, tas eyer eenlich wii meyer wërt, un tii sole unich sich hon ti fix fom meer, ti tiere woo fliie, tas haus fii, ti kans eyert un ti tiere woo sich iwer tas krunt xlepe.” 27 Un Kot hot te man noo sayn pilt kemacht, noo Kot sayn pilt hot Eyer tee kemacht; man un fraa hot Eyer tii kemacht. 28 Aach hot Kot tii keseechent un Kot hot tsu tëne kesaat: “Tuut khiner kriin, un wërt fiil un macht ti Eyert fol, un tuut se aych iwernëme, un tuut ti fix im meer un ti kriatuure woo im himel fliie un yeete lepeentich kriatuer woo sich uf te Eyert weekelt uner aych hale.” 31 Noo heyer hot Kot kesiin tas ales was eyer kemacht hat waar iwer kuut.