Psalme

55 Heer mayn kepeet, oo Kot, Un tuu net mayn aanhale fer parmhërtslichkheet kriin neewe lose. 2 Xenk mich acht un tuu mich antworte. Mayne soriche lose mich net in ruu, Un ich sin kans ër 3 Weeche ti wërter fon te faynte Un ti unertrikung fon te xlechter. Wayl tii iwerlaate mich mit unklik, Un, wuutich, tuun se piterlich xpiirung weeche mich pehale. 4 In mayn hërts, xpiire ich fiil phayn, Un ti kraule fom toot tuut mich iwernëme. 5 Pang un tsitere tuun mich iwerkhome, Un een xreklich angst halt mich fest. 6 Ich tuun imer noch saan: “Wii kuut weyer wën ich fliter wii een taup hët! Ich teet faart fliie un in sicherheet leepe. 7 Yaa, ich teet wayt weech faart fliie. Un im tesërt teet ich iwernacht xloofe. (Selaa) 8 Ich teet tsu een sicher plats xpringe, Wayt weech fom xtarke wint, wayt weech fom xtorm.” 9 Los ti xlechter konfus, oo Yeehoowa, un mach tas tëne sayn pleen xiif keen, Wayl ich hon wyolënts un xtrayt in te xtat kesiin. 10 Taach un nacht tuun se uf sayne mauere trom rom laafe; Ti xtat is fol xlechtichkheet un xwiirichkheete. 11 Unklik is in tëne sayn mite. Ti unertrikung un ti liieray tuun nii fon sayn puuplix plats faart keen. 12 Weer mich ferxpot, is net een faynt; Wën yaa, khent ich tas aus hale. Weer keeche mich is, is net een keechner; Wën yaa, khent ich mich fon tëm ferxtekele. 13 Awer tas pist tuu, eene man soo wii ich, Mayn aychne fraaynt, woo ich kuut khëne. 14 Een hërtslich fraayntxaft hot uns ferpuun, Mer sin mitsamer mim folek tsu Kot sayn haus kang. 15 Ti fernichtung sol tii erayche! Lepeentich sole se ins Kraap keen, Wayl unich tëne un in tëne tas xlechte woont. 16 Awer ich, ich tuun Kot aan ruufe; Un Yeehoowa tuut mich rete. 17 Foer nacht, moynts un am mitaach, sin ich unruych un tuun ich yaamare, Un Eyer heert mayn xtim. 18 Eyer tuut mich friit kepe un mich pefraye fon tëne woo keeche mich khëmpfe, Wayl kroose foleke keeche mich khome. 19 Kot tuut es heere un tuut tëne een antwort kepe, Tee woo fon te ferkangne tsayt aan uf sayn troon sitst. (Selaa) Tii tuun sich net ënere lose, Tii woo khee respëkt tsu Kot hon. 20 Eyer hot tii atakiirt, woo in friit mit tëm waare, Tee hot te pakt woo eyer kemacht hat, keproch. 21 Tëm sayn wërter sin woycher wii puter, Awer in sayn hërts kepts kriich. Tëm sayn wërter sin tsaater wii eel, Awer tii sin wii xwaarte woo ketsoo kep sin. 22 Xmays tayn last uf Yeehoowa, Un tee tuut tich xtitse. Tee tuut nii erlaupe tas te kerechte falt. 23 Awer tuu, oo Kot, tuu tuust tii in te tiifste kraape xmayse; Tiise pluutxultiche un hinerlistiche mëner tuun net ti heleft fon sayn taache leepe. Awer ich, ich tuun aan tich traue.