Matheus

6 “Phast uf fer net tas kuutes foer ti mënxe mache ploos tas se aych mërke. Wën net, tuut ayre Fater im himel aych khee peloonung kepe. 2 Soo, wëns tuu etwas fer ti aarme kepst, mach tas net pekhant foer ti anere, soo wii yemant woo een trompeet ploost. Tii woo sich wii kerechte layt ferxtele, mache kraat tas in sayn aanpeetung pletse un uf te xtroose fer loop fon te mënxe kriin. Ich lose aych sicher: tii hon xon sayn kanse peloonung kriit. 3 Awer wëns tuu etwas fer ti aarme kepst, los net tayn links hant wise was tayn recht hant macht. 4 Los net ti anere siin tas kuutes woos tuu machst. Tan tayn Fater, woo ales siit, tuut tich peloone. 5 “Un noch: wën teyer peet, sayt net soo wii tii woo sich wii kerecht ferxtele. Wën se peete, tuun se kërn xteen plaype woo al tëne siin khene — in sayn aanpeetung pletse un in te eke fon te haupste xtroose. Ich lose aych sicher: tii hon xon sayn kanse peloonung kriit. 6 Awer wëns tuu peetst, khee aleen in tayn tsimer un mach ti teer tsu. Tan peet tsu tayn Fater. Nimant khan tëm siin, awer tee siit ales un tuut tich peloone. 7 Wëns tuu peetst, tuu net ti selwiche wërter noo un noo saan. Tas is was ti layt fon te anere natsyoone mache. Tii rechne tas te Hërkot se horicht wayl se lange kepeete mache. 8 Sayt net soo wii tëne. Ayre Fater wees was teyer praycht eep teyer es ferlangt. 9 “Tes weeche solt teyer soo peete: “ ‘Unser Fater im himel, tayn naame sol kehaylicht wëre. 10 Tayn Raych sol khome. Tayn wile sol kemacht wëre, wii im himel, soo aach uf te eyert. 11 Kep uns hayt proot fer tiise taach. 12 Fertsay unser xulte, soo wii meyer aach fertsaye tii woo uns xultich sin. 13 Un los net tas mer in te fersuuchung fale, awer ret uns fom Taywel.’ 14 “Wën teyer ti mënxe fertsayt, woo xlechte tinge keeche aych mache, tuut ayre Fater im himel aych aach fertsaye. 15 Awer wën teyer net ti mënxe fertsayt, woo xlechte tinge keeche aych mache, tuut ayre Fater aych aach net fertsaye wën teyer tas xlechtes macht. 16 “Wën teyer faste tuut, macht net een traurich kesicht, soo wii ti layt woo sich wii kerecht ferxtele. Tii mache tas soo tas ti anere wise tas se am faste sin. Ich lose aych sicher: tii hon xon sayn kanse peloonung kriit. 17 Awer tuu, wëns tuu faste tuust, phas tayn hoer uf un wex tayn kesicht. 18 Soo tuun ti mënxe net wise tas tuu am faste pist. Los tas ploos tayn Fater im himel es siit. Tan tayn Fater, woo ales siit, tuut tich peloone. 19 “Lost mool noo xatse uf te eyert samele. Ti insëkte un te rost khene se fersaue un ti xpitspuupe khene rin khome un tëne xteele. 20 Xtats tas, samelt xatse im himel. Tat khene ti insëkte un te rost se net fersaue un ti xpitspuupe khene net rin keen un tëne xteele. 21 Wayl woo tayn xats xteet, kraat tat tuut tayn hërts xteen. 22 “Ti aue sin ti lamp fom khërper. Wën tayn aue sich aan tëm richtiches traan hale, tuut tayn kanse khërper xayne. 23 Awer wën tayn aue naytich sin, wërt tayn kanse khërper tunkel sin. Tas weyer aarich xreklich wën tayn licht, tunkelheet weyer. 24 “Nimant khan 2 xëfe tiine. Wën eyer eene liipt, tuut eyer te aner hase. Un wën eyer troy tsu eene fon tëne is, tuut eyer te aner net respektiire. Teyer khent net te Hërkot un te Raychtum tiine. 25 “Tes weeche saan ich aych: lost mool noo aych ketanke mache iwer aych selepst un iwer was teyer ese, trinke orer aan tsiie tuut. Ayre leepe hot mee weyert wii tas ese; un ayre khërper, wii tas tsaych woo teyer aan tsiit. 26 Peopacht ti feechel im himel. Tii tuun net seeye, ërnte orer in xope samele. Noch soo tuut ayre Fater im himel tëne fersoriche. Meecht teyer net mee weyert hon wii tii? 27 Weer fon aych khan sayn leepe noore een xtun lënger lose wayl eyer sich ketanke macht? 28 Un warom macht teyer aych aach ketanke iwer tas tsaych? Lërnt fon te wilte pluume. Tii tuun net xweyer xafe orer tsaych mache. 29 Awer ich saan aych tas noch net mool Salomon in al sayn faynheet hot sich soo xeen aan ketsoo wii eene fon tëne. 30 Te Hërkot tuut soo aan tsiie ti wilte pluume woo hayt too hiir sin un moye in te oowe kexmis wëre. Soo tuut eyer noch mee fer aych mache, opwool teyer weeniche klaape hot. 31 Tes weeche macht aych nii ketanke un saat: ‘Was tuun mer ese?’ orer, ‘Was tuun mer trinke?’ orer, ‘Was tuun mer aan tsiie?’ 32 Wayl sin ti layt fon te anere natsyoone woo sich fiil ketanke too triwer mache. Ayre Fater im himel wees tas teyer tas ales praycht. 33 “Xtelt wayter Kot sayn Raych im eyerste plats in ayre leepe un tuut Kot imer foliche, un al tiise anere tinge wëre aych fersoricht. 34 Soo macht aych nii ketanke iwer te neekste taach, wayl te neekste taach hot sayn aychne soriche. Yeete taach pringt kenuuch xwiirichkheete mit sich.