Teuteronoomyum

7 “Wën Yeehoowa, tayn Kot, tich tsu tas lant nëmt woos tuu klaych rin keest fer tat woone, tee tuut aach foer tich kroose foleke wech xike: ti hitiiter, ti xirkasiiter, ti amoriiter, ti kananiiter, ti perisiiter, ti hewiiter un ti jepuseer, siwe natsyoone xtërke un kreeser wiis tuu. 2 Yeehoowa, tayn Kot, kept se fer tich ap, un tuu tuust se fernichte. Tuu must oone feeler tëne fernichte. Mach khee pakt mit tëne un tsaych se khee kefale. 3 Mach khee pakt torich hayrat mit tëne. Kep net tayn meet fer tëne sayn soone un hool aach net tëne sayn meet fer tayne soone. 4 Wayl tii tuun tayn khiner ap lenke fon mich tiine, un tii tuun anere keeter tiine. Tan Yeehoowa sayn wuut keet keeche aych aan un eyer tuut aych xnel fernichte. 5 “Xtats tas, solt teyer tas mache: fernicht tëne sayn altare, ferprecht tëne sayn hayliche phoste, xmayst um tëne sayn hayliche pheel un ferprënt tëne sayn auskepikne xtaatue. 6 Wayl iir sayt een haylich folek fer Yeehoowa, ayer Kot; Yeehoowa, ayer Kot, hot aych raus kesuucht fer tëm sayn folek sin, sayn spetsyaal aychentum tswixich ti kanse foleke woos uf ti eyert kept. 7 “Es waar net weeche iir een kroos folek sayt, tas Yeehoowa aych raus kesuucht hot, un kërn kehat hot, wayl teyer waart te kleenste fon te kanse foleke. 8 Awer es waar weeche Yeehoowa aych keliipt hot, un fer sayn ferxpreche erfiile woo eyer fer ayre foerfatere kemacht hot. Tes weeche, Yeehoowa hot aych tat raus kehool mit mechtich hant, fer aych tsurik hoole fon tëm lant fon sklaaweray, unich Faraoo sayn macht, kheenich fom Ejipt. 9 Tuu weest kans kenau tas Yeehoowa, tayn Kot, is te woere Kot, te troye Kot, woo mit tich sayn pakt un sayn leaale liip halt pis ti tausëntste xeneratsyoon fon tëne woo tëm liipe un hale sayn kepoote in. 10 Awer fer tii woo tëm hase, tee tuut tëne tsurik petsaale mit fernichtung. Tee is net lamsam mit tii woo tëm hase tuun; eyer tuut tëne tsurik petsaale foer sayn kesicht. 11 Tes weeche, phas uf fer in hale ti kepoote, ti kesetse un ti kerichts entxlise woo ich hayt aych xike, un tuut se aan heere. 12 “Wën iir wayter acht kept fer tiise kerichts entxlise un tii in halt, un soo macht, Yeehoowa, ayer Kot, tuut mit aych sayn pakt un sayn leaale liip hale, woo eyer fer ayre foerfatere ferxproch hot. 13 Un tee tuut tich liipe, seechne un fermeere. Yaa, tee tuut tich seechne mit fiile khiner, mit te protutsyoon fon te eyert — tayn sereaal, tayn naye wayn un tayn eel — un mit yunge fer tayn khii un fer tayn xeef, in tas lant woo eyer tich kept, soo wii eyer ferxproch hot fer tayn foerfatere. 14 Tuu wërst te keseenchenst fon te kanse foleke; khee man un khee fraa tswixich aych playpt oone khiner, un aach ayre fiitsaych, oone yunge. 15 Yeehoowa fernicht tswixich aych ti kanse krankheete un pringt net iwich tich ti xweyere krankheete woos tuu kekhënt host im Ejipt. Xtats tas, tee macht tas tas khomt iwich tii woo tich hase. 16 Tuu solst fernichte ti kanse foleke woo Yeehoowa, tayn Kot, tich ap kept. Tuu solst khee mitlayt fon tëne hon un tiint net tëne sayn keeter, wayl tas weyer een las fer tich.