Romaaner

2 Wayl tas kesets fom kayst, woo leepe kept in eenichkheet mit Kristus Yeesus, hot tich fom kesets fon te sint un fom toot fray kemacht. 6 Wayl ti ketanke am flayx hale petayt toot, awer ti ketanke am kayst hale, petayt leepe un friit. 7 Wayl ti ketanke aans flayx hale petayt uneenichkheet mit Kot, wayl tas flayx halt sich net unich Kot sayn kesets un khan sich aach wërklich net hale. 8 Un soo, ti woo in eenichkheet mim flayx leepe, khene Kot net kefale. 12 Soo, priiter, meyer hon een flicht, awer net mit unser flayx, es wil saan, fer se leepe tëm noo ti winxe fom flayx 13 wayl, wën teyer tëm noo ti winxe fom flayx leepe, tuut teyer sicher xtërpe. Awer, wën teyer torich te kayst ti winxe fom flayx kaput mache, tuut teyer leepe. 14 Wayl al tii woo fon Kot sayn kayst kelënkt sin, sin wërklich Kot sayn soone. 15 Wayl teyer hot net een kayst kriit fer sklaawe wëre, woo aych noch mool angst kept. Awer teyer hot een kayst kriit fer wii soone aan kenom wëre, un es is torich tiise kayst tas meyer aan hale: “Apa, Fater!” 16 Te kayst selepst kept tsayer mit unser hërts* tas mer Kot sayn khiner sin. 17 Tan, wën meyer khiner sin, sin mer ërper — ërper fon Kot, awer aach mitërper mit Kristus — wën meyer mit tëm layte, tas mer aach mit tëm ferhaylicht wëre. 18 Tes weeche, tuun ich ti xwiirichkheete fon tiise tsayt wii kaar niks aan siin, wën mer tas ferklayche mit tëm hërlichkheet woo fer uns ketsaycht wërt. 19 Wayl ti kriatsyoon tuut mit xtarke wunx ti rewelatsyoon fon Kot sayn khiner waarte. 20 Wayl ti kriatsyoon is unich te unutslichkheet kextelt kep, net weeche sayn aychne wile, awer weeche te wile fon tëm woo se uner kextelt hot. In te selwich tsayt, is te funtament fer een hofnung keleet kep: 21 ti kriatsyoon wërt fon te sklaaweray tsu te fernichtung fray kemacht un tuut ti hërlich frayheet fon Kot sayn khiner kriin. 22 Wayl meyer wise tas ti kans kriatsyoon tuut mitsamer yaamare un pis yets phayn xpiire. 23 Net ploos tas, awer meyer selepst woo ti eyerste frichte hon — es wil saan, te kayst — yaa, meyer selepst tuun inerlich yaamere soo lang wii mer mit xtarke wunx waarte wii khiner aan kenom wëre, tas mer fon unser khërper torich een fray khaaf pefrayt wëre khene. 24 Wayl meyer sin in tiise hofnung keret kep. Awer ti hofnung woo ma siit, is khee hofnung, wayl, wii khan yemant hofe uf etwas woo eyer siit? 25 Awer, wën meyer hofe uf etwas woo mer net siin khene, tuun mer wayter mit xtarke wunx un persewerans waarte. 26 In te selwich aat, tuut te kayst uns aach in unser xwacheet helfe. Wayl tas propleem is tas, als mool, wise mer net was mer im kepeet ferlange sole. Toch, te kayst selepst tuut fer uns aan hale mit yaamare woo net aus kexproch sin. 27 Awer tee woo ti hërtse noo kukt, wees was te kayst saan wil, wayl te kayst aan halt fer ti hayliche layt in een aat woo mit Kot sayn wile xtimt. 28 Meyer wise tas Kot macht tas al sayn aarwayte khene mitsamer mim kuutes helfe tii woo Kot liipe un woo keruuf kep sin tëm noo Sayn tsiil, 29 wayl tii woo eyer sayn acht eyerst kehal hot, tiise layt hot eyer foer heyer raus kesuucht tas se tëm noo tas pilt fon Sayn Soon kemustert weyere, tas eyer te eyerste keporene soon tswixich fiile priiter weyer. 30 Un noch, iwer tii woo eyer foer heyer raus kesuucht, hot eyer se aach keruuft; un iwer tii eyer keruuft hot, hot eyer aach wii kerechte aus kexproch. Tsum xlus, iwer tii woo eyer wii kerechte aus kexproch hot, hot eyer se aach ferhërlicht. 31 Tan, was khene mer too triwer saan? Wën Kot pay uns is, weer khan sich keeche uns xtele? 32 Wën eyer noch net mool sayn aychne Soon kexoont hot, awer hot iim fer uns al ap kep, meecht eyer, mit sayn Soon, net kuuthërtslich al ti anere tinge fer uns kepe? 33 Weer tuut etwas keeche ti rauskesuuchtne fon Kot saan? Es is Kot woo tëne wii kerechte aus xprecht. 34 Weer tuut se xultich aus xpreche? Yeesus Kristus is tee woo kextorep is un, noch mee, eyer is tee woo fom toot uf kextii is, tee woo uf Kot sayn rechts sayt is un tee woo fer uns aan hale tuut. 35 Weer tuut uns fon Kristus sayn liip aus naner mache? Wërt es tripulatsyoon, orer petrikung, orer yachtung, orer hunger, orer nakichkheet, orer kefoer orer ti xwaart sin? 36 Soo wiis kexrip is: “Weeche tich, wëre mer ti kans tsayt tsum toot ap kep; mer sin aan kesiin wii xeef woo mise kexlacht wëre.” 37 Kans anerste, weeche tee woo uns keliipt hot, khome mer torich tas ales triwer wech. 38 Wayl ich sin mich sicher tas khee toot orer leepe, khee engel orer rechiirung, niks woos hayt kept orer woo noch khomt, khee kraft, 39 khee heech orer tiif, orer kwalkee aner kriatsyoon khan uns fon Kot sayn liip aus naner mache, woo in Yeesus Kristus, unser Hër, is.