Koloser
1 Phaul, aphostel fon Yeesus Kristus* torich Kot sayn wile, un Timoteo, unser pruuter, Lit:Kristus Yeesus 2 fer ti hayliche un troye priiter in eenichkheet mit Kristus woo in Kolosos sin: Tas aych unfertiint kuutheet un friit fon Kot, unser Fater hot. 3 Meyer tanke imer tsu Kot, te Fater fon unser Hër Yeesus Kristus, wën mer fer aych peete, 4 wayl mer hon keheert fon ayre klaape aan Yeesus Kristus* un ayre liip fer ti hayliche al 5 weeche ti hofnung woo fer aych im himel kehal is. Teyer hot xon iwer tiise hofnung keheert torich tas pexeet fon te woerheet, ti kuute notisye 6 woo tsu aych khom sin. Soo wii ti kuute notisye tuun frucht kepe un sich uf te kans welt ferkreesere, tuut tas selwich tswixich aych aach pasiire, tsayt teyer kenau Kot sayn unfertiint kuutheet in woerheet keheert un kekhënt hot. 7 Tas is was iir fon unser keliipte Epafras kelërnt hot, woo sklaaw mit uns is, te troy tiiner fon Kristus, woo in unsere plats tiine tuut. 8 Ëyer hot aach uns iwer ayre liip fertseelt woo iir in kaystlich aat hot. 9 Es is aach weeche tas, tas tsayt tëm taach woo mer es keheert hon, hon mer net noo kelos iwer aych peete un ferlange tas teyer fol kept mit te kenau khëntnis fon tëm sayn wile, in ale kluucheet un ferxtëntnis iwer kaystliche sache, 10 tas teyer kexayt foer Yeehoowa keet un tee in ales tsufriite lost, soo lang wii teyer wayter in yeete kuut aarwayt frucht kept un in Kot sayn kenau khëntnis wakst. 11 Meyer ferlange aach tas teyer mit te kanse macht ferxtërkt wërt, torich tëm sayn hërlich macht, tas teyer ales mit ketult un frooheet aus hale khent, 12 un fer te Fater tanke, woo hot es meechlich kemacht tas tëyer in te ërpxaft fon te hayliche im licht mit mache khënt. 13 Eyer hot uns fon te kewalt fon te tunkelheet fray kemacht un hot uns tsum raych fon sayn keliipte Soon kenom. 14 Torich tëm sayn fray khaaf opfer, hon mer unser pefrayung kriit, es wil saan, ti fertsayung fon unsere sinte. 15 Eyer is tas pilt fom Kot woo mer net siin khene, eyer is te eyerst kepoerne fon ales woo kemacht kep is; 16 torich tëm sin ale anere tinge kemacht kep, im himel un uf te eyert, ti tinge woo mer siin khene, un tii woo mer net siin khene, ekaal op se troone orer hërxafte, rechiirunge orer autoriteete sin. Ti kanse tinge sin torich tee un fer tee kemacht kep. 17 Aach, tee hot xon eksistiirt eep tiise ale anere tinge, un torich tëm sin ale anere tinge kemacht këp. 18 Tee is te khop fom khërper, woo ti kemaynt is. Tee is te aanfang, te ëyertse kepoorene fon te toote, tas ëyer in ale tinge te ëyerste wëyert; 19 wayl Kot hot kuut kefun tas ale tinge in tëm woone teete 20 un torich tëm, tuun ale anere tinge friit aan tëm sëlepst mache, ti tinge uf te eyert un aach ti tinge im himel, fer friit in setse torich tas pluut woo eyer im phool aus kexut hot. 21 Yaa, friier, waart teyer fon Kot wayt wech un waart aach tëm sayn faynte, wayl teyer ayre ketanke in xlechte tinge kehal hat. 22 Awer yets, hot eyer friit mit aych kemacht torich tas mënxliche khërper fon tee woo kextorep is, tas teyer khent haylich, oone feeler un fray fon kwalkee xult foer tëm khome. 23 Natiirlich, ploos wën teyer wayter ayre klaape halt, xtark uf tëm funtament xteet un fest playpt, oone aych aus naner mache fon te hofnung fon te kuute notisye woo teyer keheert hot un woo fer ti kans kriatsyoon unich tëm himel kepreeticht kep is. Ich, Phaul, sin een tiiner fon tiise kuute notisye kep.