Matheus

5 Wii Yeesus ti layt kesiin hot, is eyer uf tëm përich kang. Noo tas eyer sich kesetst hot, sin sayn tisipele pay tëm khom. 2 Tan hot eyer aan kefang tëne in lërne: 3 “Froo sin tii woo erkhëne tas se Kot sayn lenkung prayche, wayl Kot sayn Raych, woo im himel is, keheert tsu tëne. 4 “Froo sin tii woo sich traurich xpiire, wayl tii wëre ketreest. 5 “Froo sin tii woo tsaam sin, wayl tii tuun ti eyert ërpe. 6 “Froo sin tii woo hërtslich winxe was richtich is, wayl te Hërkot tuut se tsufriite lose. 7 “Froo sin tii woo parmhërtslich sin, wayl tii wëre mit parmhërtslichkheet pehantelt. 8 “Froo sin tii woo een phuer hërts hon, wayl tii tuun te Hërkot siin. 9 “Froo sin tii woo friit mit te anere mache, wayl tii wëre Kot sayn khiner kenënt. 10 “Froo sin tii woo keyacht sin wayl se tas richtiches mache, wayl Kot sayn Raych, woo im himel is, keheert tsu tëne. 11 “Froo sayt teyer wën ti layt aych ferxëne, yachte un ale sorte liie un xlechte tinge keeche aych saan weeche mich. 12 Tuut aych fiil fraye, wayl Kot tuut aych een kroos peloonung kepe. Ti layt hon kraat soo keyacht ti profeete woo foer aych keleept hon. 13 “Teyer sayt te sals fon te eyert, awer wën te sals sayn kexmak ferliirt, khan eyer tas net mee tsurik kriin. Es tiint fer niks mee, ploos fer traus kexmis wëre tas ti layt iwich tëm treete. 14 “In tiise tunkel welt, sayt teyer soo wii licht. Een xtat woo uf tëm përich is, khan net ferxtekelt wëre. 15 Wën ti layt een lamp aan mache, tuun se tas net unich een khorp xtele, awer tii xtele tas uf een tix un es xaynt iwer al woo im haus sin. 16 Kraat soo, lost ayre licht foer ti mënxe xayne, soo tas se ayre kuute aarwayte siin khene un eer kepe tsu ayre Fater woo im himel is. 17 “Tenkt net tas ich khom sin fer tas Kesets orer ti wërter fon te profeete fernichte. Ich sin khom fer tëne erfiile, net fernichte. 18 Ich lose aych sicher: noch net mool tas kleenste puuchxtaap orer een xtrich fon een puuchxtaap fom Kesets tuut ferxwiine eep tas ales sich erfiilt. Es weyer laychter tas te himel un ti eyert ferxwiine teete! 19 Tes weeche weer eene fon te kleenste kepoote unfolicht un ti anere in lërnt tas aach mache, wërt net aan kenom im Raych woo im himel is. Awer weer tas Kesets folicht un ti anere in lërnt tas aach mache, wërt aan kenom im Raych woo im himel is. 20 Wayl ich saan aych tas, wën teyer net kerechter wii ti fariseer un ti leerer fom Kesets sayt, wërt teyer nii erlaupt im Raych woo im himel is, rin keen. 21 “Teyer hot keheert was kesaat waar fer ayre foerkhomer: ‘Tuu thërfst net um pringe. Weer yemant um pringt, tuut ap rechnunge mit tëm kericht mache.’ 22 Awer ich saan aych tas yeete eene woo wuutich mit sayn pruuter playpt, tuut ap rechnunge mim kericht mache. Un weer sayn pruuter ferxënt, tuut ap rechnunge mim Heechste Kericht mache. Awer weer fer sayn pruuter saat: ‘Tuu pist een tapes!’, khan mit fernichtung kericht wëre. 23 “Soo, wëns tuu tayn opfer foer Kot am nëme pist un tuu tenkst tich traan tas tayn pruuter pees mit tich is, 24 los tayn opfer foer te altar. Kee un mach eyerst friit mit tayn pruuter. Tan khom tsurik un mach tayn opfer. 25 “Wën een faynt tich foer tas kericht nëmt, tuu ti sache mit tëm fiks resolwiire, soo lang wii teyer pis tëm kericht plats keet. Wën net, khan tayn faynt tich tsum richter ap kepe un te richter khan tich xultich aus xpreche un tich tsum kerichts tiiner ap kepe un tan wërst tuu in te katee kexmis. 26 Ich lose tich sicher: tuu khomst fon tat net raus pis tuu tayn letste nikelche petsaalst. 27 “Teyer hot keheert tas es kesaat waar: ‘Tuu thërfst net sëks aus ti hayrat mache.’ 28 Awer ich saan aych tas yeete eene woo wayter noo een fraa kukt un lust noo tëne xpiirt, hot xon im hërts sëks aus ti hayrat kemacht. 29 Soo, wën tayn recht au tich sinte macht, rop tëm aus un xmays tëm wech. Rechter een teel fom khërper ferliire wii te kanse khërper fernicht wëre. 30 Un wën tayn recht hant tich sinte macht, xnayt se ap un xmays se wech. Rechter een teel fom khërper ferliire wii te kanse khërper fernicht wëre. 31 “Es is aach kesaat kep: ‘Weer sich fon sayn fraa tiworsiirt, sol tëne een tiwors tokument kepe.’ 32 Awer ich saan aych tas eene man sol sich net fon sayn fraa tiworsiire, heechstens wën se een seksuaale sint kemacht hot. Wën net, khan sin tas se sëks aus ti hayrat macht un weer sich mit tiise tiworsiirt fraa hayrat, is aach xultich fon te selwich sint. 33 “Teyer hot aach keheert tas es kesaat waar fer ayre foerkhomer: ‘Tuu thërfst net een jurament mache un tan es net erfiile. Ales was tuu fer Yeehoowa ferxpreche tuust, must tuu mache.’ 34 Awer ich saan aych: teyer solt net een jurament mache, noch net mool paym himel, wayl es is Kot sayn troon; 35 noch net mool pay te eyert, wayl tii is ti xtuul woo Eyer sayn fiis ruue tuut; noch net mool pay Yeruusalem, wayl tii is ti xtat fom kroose Kheenich. 36 Tuu net een jurament pay tayn khop mache, wayl noch net mool een eensiche hoer khanst tuu ways orer xwarts mache. 37 Wën teyer ‘yaa’ saat, tas sol ‘yaa’ petayte. Un wën teyer ‘nee’ saat, tas sol ‘nee’ petayte. Wayl kwalkee aner wort khomt fom Taywel. 38 “Teyer hot keheert tas es kesaat waar: ‘Au fer au un tsaan fer tsaan.’ 39 Awer ich saan aych: tuut net tsurik petsaale was een xlecht persoon keeche aych macht. Wën yemant tich ins kesicht haut, los tee aach ti aner sayt haue. 40 Un wën yemant wil tich foer tas kericht nëme fer tayn himt fer sich hoole, los eyer aach tayn mantel nëme. 41 Un wën een autoriteet tich xikt etwas mache, mach noch mee wii eyer xikt. 42 Wën yemant tich etwas ferlangt, kep tas tëm; wën yemant wil etwas keporicht, porich tas tëm. 43 “Teyer hot keheert tas es kesaat waar: ‘Tuu solst tayn neekste liipe un tayn faynt hase.’ 44 Awer ich saan aych: liipt ayre faynte un peet fer tii woo aych yachte. 45 Soo tuut teyer pewayse tas teyer soone sayt fon ayre Fater woo im himel is. Tee lost ti sun uf keen iwich ti xlechte un ti kuute. Un tee lost reene iwich ti kerechte un ti unkerechte. 46 Wën teyer liipt tii woo aych liipe, warom solt teyer een peloonung kriin? Soo kaar tii woo xtayer kopriire mache tas. 47 Un wën teyer ploos ayre priiter pekriist, meecht tas was ekstras sin? Soo kaar ti layt fon te anere natsyoone mache tas. 48 Tes weeche, solt teyer perfekt sin, soo wii ayre Fater im himel perfekt is.