Xeenesis

3 Ti xlang waar tas foersichtichste fon te kanse tiere woo Yeehoowa Kot kemacht hot. Soo, hot se fer ti fraa kesaat: “Hot Kot wërklich kesaat tas teyer net fon ale oopst peem fom kaate ese thërft?” 2 Too hot ti fraa fer ti xlang kesaat: “Meyer khene fon te oopst peem woo im kaate sin, ese. 3 Awer, iwer tas oopst fom paam woo in te mite fom kaate is, too hot Kot kesaat: ‘Tuut net fon tëne ese, nee, un tuut aach net aan tëne traan krayfe, tas teyer net xtërpe tuut.’” 4 Too, hot ti xlang fer ti fraa kesaat: “Es is sicher tas teyer net xtërpe tuut. 5 Wayl Kot wees tas am selwiche taach woo teyer fon tëne est, tuun ayre aue uf keen un teyer wërt wii Kot, un teyer tuut tan wise was kuut un was xlecht is.” 6 Un soo, hot ti fraa kesiin tas te paam kuute oopst hat, un tas es etwas waar fer ti aue se winxe, yaa, te paam waar winxlich fer aan se kuke. Un too hot ti fraa aan kefang fom oopst hoole un se ese. Nochter, hot se aach tefun fer sayn man kep, wii eyer pay tëne waar, un eyer hot aan kefang se ese. 7 Tan sin tëne sayn aue uf kang, un tii hon kemërkt tas se nakich waare.Tes weeche hon se fayche pleter samer keflikt fer sayn nakichkheet se teke. 11 Too hot tee kefroot: “Weer hot kesaat tas tuu nakich weyerst? Host tuu im xtant fon tëm paam kes, woo ich kexikt hat tas tuu net ese solst?” 13 Yeehoowa hot tan tsu ti fraa kesaat: “Was host tuu kemacht?” Ti fraa hot keantwort: “Ti xlang hot mich hinerkang, tes weeche hon ich kes.” 14 Too, hot Yeehoowa Kot fer ti xlang kesaat: “Wayls tuu tas kemacht host, pist tuu ferfluucht tswixich al ti haus tiere un wilte tiere. Tuu tuust tich xlepe mit tayn layp ufm pootem un tuust xtaap frese ti kanse taache fon tayn leepe. 15 Un ich tuun fayntxaft mache tswixich tich un ti fraa, un tswixich tayn nookhomer un te nookhomer fon te fraa. Tee tuut tayn khop fertrike, un tuu tuust tëm sayn feerst wee mache.” 16 Fer ti fraa hot eyer kesaat: “Ich tuun ti phayn fon tayn xwangerxaft fiil kreeser mache; in phayn tuust tuu khiner uf ti welt pringe, un tuu tuust wunx hon fer mit tayn man plaype, un tee tuut tich hërxe.” 17 Un fer Aatam hot eyer kesaat: “Wayls tuu ti xtim fon tayn fraa aan keheert host un host ti frucht fom paam kes woo ich tich kexikt hon: ‘Tuu net fon tëm ese’, ferfluucht is tas lant weeche tich. In phayn tuust tuu yeete taach fon tayn leepe tas esmitel fom lant ese. 18 Un fom lant tuun tërner un unkraut wakse, un tuu tuust ti plantse fom khamp ese. 19 Im xwits fon tayn kesicht tuust tuu proot ese, pis tuu tsum krunt tsurik keest, wayls tuu fon tëm kehool kep pist. Wayls tuu xtaap pist un tsum xtaap tuust tuu tsurik keen.” 22 Tan hot Yeehoowa Kot kesaat: “Te man is soo wii eene fon uns kep un wees was kuut un was xlecht is. Yets, tas eyer net sayn hant aus xtrekt, fon te frucht fom paam fons leepe nëmt, un too tefun est un fer imer leept...” 23 Too, hot Yeehoowa tee aus tëm Eetem kaate raus kexikt, tas eyer te krunt tsakere solt, fon tëm woo tee kehoolt kep waar. 24 Soo hot eyer te mënx raus kexikt un hot in te ost sayt fom Eetem kaate ti kherupiine hin kextelt un een fayer xnayt fon een xwaart, woo sich ti kans tsayt ketrilest hot, fer te weech tsum paam fom leepe uf se phase.