Hepreeyer

12 Wayl meyer een kroos wolk tsayer um uns rom hon, wole mer ale laste un ti sint woo uns laycht in wikelt wech xmayse, un wole mer wayter xpringe in tëm xpringe woo foer uns is, 2 un tuun mer mit acht fer Yeesus kuke, tee woo te Haupste Mitler fon unser klaape is un tee woo unser klaape komplët macht. Weeche ti frooheet woo tëm foer kextelt waar, hot eyer te toot in een kweel phoste aus kehal, ti xaam uf sayt kelos un sich uf te rechts sayt fon Kot sayn troon kesetst. 3 Yawool, tuut mit acht tenke aan tëm woo soo fiil xlechte wërter fon sintiche layt aus kehal hot, woo keeche tëne sayn aychne interëse kang sin, tas teyer net miit kept un uf kept. 4 In ayre khëmpf keeche tiise sint, hot tëyer noch nët aus kehalt pis aan ayre pluut aus kexut wërt. 5 Un teyer hot aych kans ferkes fon ti aanreet woo fer aych, wii khiner, kesaat kep is: “Mayne soon, tuu net ti tisipliin fon Yeehoowa uf sayt lose un tuu net ti muut ferliire wëns tuu fon tëm aan kereet kepst. 6 Wayl Yeehoowa tuut tii woo Eyer liipt, tisipliniire; yawool, eyer tisipliniirt yeete eene woo tee wii soon aan nëmt.” 7 Wii teel fon ayre iipung, mist teyer wayter aus hale. Kot tuut aych wii tëm sayne khiner pehantele. Wayl was fer khint is net fon sayn fater tisipliniirt? 8 Awer, wën tëyer al nët tiise tisipliin kriit hot, sayt tëyer wërklich falxe khiner, un nët woere khiner. 9 Ale tëm, unsere mënxliche ëltere hon uns tisipliin këp un mëyer hon se rexpëktiirt. Thërft tan mer nët noch mee uns unich te Fater fon unser kaystlich leepe hale, tas mëyer wayter am leepe plaype? 10 Wayl tii hon uns ti tisipliin torich een khorts tsayt kep, tëm noo was fer tëne kuut aus kesiin hot, awer tee macht tas fer unser aychne nuts, tas meyer teel in tëm sayn haylichkheet hon. 11 Es is woer tas khee tisipliin tuut in tëm momënt aus siin wii een uersach fer sich fraye, awer tuut wee. Awer nochter, pringt se ti friitlich frucht fon kerechtichkheet fer tëne woo torich ti tisipliin keiipt sin. 12 Soo, tuut ti hënt woo miit sin un ti kniie woo xwach sin, ferxtërke, 13 un tuut wayter ti xtroose fer tayne fiis richtich mache, tas te laame nët xlëchter këpt, awer, uf aner sayt, tas tee kesunt këpt. 14 Xtrëngt aych aan fer friit mit ale hale un fer tas haylichkheet, wayl oone tii, tuut khee mënx te Hër siin. 15 Phast fiil uf tas nimant noo lost Kot sayn unfertiint kuutheet se kriin, tas khee kiftich wortsel wakse tuut fer xwiirichkheete pringe, un fiile fon tëm ferkift wëre; 16 un phast uf tas es net yemant tswixich aych kept woo seksuaal imoraaliteet pratikiirt, aach net yemant woo net weyert fer hayliche tinge kept, soo wii Esau kemacht hot, woo sayn rechte wii eyerste kepoorene soon weeche ploos een teeler ese um ketrukt hot. 17 Wayl tëyer wist tas nochter, wii ëyer te seechen ërpe wolt, waar er uf sayt kelos; wayl, opwool tee mit treene fiil aan kehal hot fer te ëntxlus ënere, hot ëyer tas nët hin kriit. 22 Awer teyer hot aych ticht tsu een përich Syoon kexaft un tsu een xtat fom lepeentiche Kot, ti himlix Yeruusalem, un tsu tausente ëngele 23 woo sich fersamelt hon, un tsu te kemanyt fon te eyerst kepoorene soone woo im himel in kexrip sin, un tsu Kot, te richter fon ale kaar, un tsum kaystliche leepe fon te kerechte woo perfekt kemacht kep sin, 26 In tiise tsayt, hot tëm sayn xtim ti eyert kexiitelt, awer yets, hot eyer ferxproch: “Noch een mool, xiitele ich, net ploos ti eyert, awer aach te himel.” 27 Ti wërter “noch een mool” tsayche tas ti tinge woo kexiitelt sin — ti tinge woo kemacht sin — wëre fernicht, tas ti tinge woo net kexiitelt sin, plaype tuun. 28 Tes weeche, wayl mer een Raych kriin tuun woo khan net kexiitelt wëre, wole mer wayter unfertiint kuutheet kriin; torich tii, khene mer haylich tiinst tsu Kot kepe tëm noo was Tëm kefalt, mit tiif respekt un eer. 29 Wayl unser Kot is een fayer woo fernicht.