2te Korinter

4 Soo, wayl mer tiise tiinst hon torich ti parmhërtslichkheet woo fer uns kep is, tuun mer net uf kepe. 2 Uf aner sayt, tuun mer tas tings woo xaam pringt, un woo heelich kemacht këp sin, neewe lose, un tuun mer nët ti anere hiner keen, un aach nët Kot sayn wort anerste mache; awer, tuun mer ti woerheet pekhant mache, un soo, sin mer payxpiile fer tas kanse mënxliche kewise foer Kot. 3 Wën yets ti kuute notisye woo mer preetiche, ferxtëkelt sin, sin se ferxtëkelt unich tëne, woo uf tëm weech tsu te fernichtung sin, 4 unich tëne hot te kot fon tiise welt te ferxtant fon te unklaapiche plint kemacht, tas tas licht fon te hërliche kuute notisye iwer Kristus, woo Kot sayn pilt is, net torich xayne sol. 5 Wayl mëyer tuun nët iwer uns sëlepst preetiche, awer iwer Yeesus Kristus wii Hër, un iwer uns sëlepst wii sklaawe fon aych weeche Yeesus. 6 Wayl waar Kot woo kesaat hot: “Fon te tunkelheet tuut tas licht xayne”, un tee is am xayne iwer unsere hërtse, fer aych hel lose mit te hërlich khëntnis fon Kot torich Kristus sayn kesicht. 7 Awer meyer hon tiise xats in leet waase, tas ti iwermeesich kraft fon Kot khomt, net fon uns selepst. 8 Meyer sin in ale aate uner trikt, awer kriin mer uns noch weekle; meyer wise net was se mache, awer sin mer net oone ausweech; 9 meyer sin keyacht, awer net im xtich kelos; meyer sin runer kexmis, awer net fernicht. 10 Meyer tuun imer in unser khërper aus hale ti xroo xwiirichkheet woo Yeesus mit kemacht hot, tas Yeesus sayn leepe aach in unser khërper tsum foer xayn khomt. 11 Wayl mëyer, woo am leepe sin, tuun mer imer foer te toot sin, weeche Yeesus, tas Yeesus sayn leepe sich aach in unser xtërplich flayx tsum foer xayn khomt. 12 Soo, tuut te toot in uns hantele, awer in aych, tas leepe. 13 Yets, wayl meyer te selwiche kayst fom klaape hon, un woo iwer tëm kexrip kep is: “Ich hon keklaapt, tes weeche hon ich kexprooch”, meyer hon aach klaape keiipt un tes weeche hon mer kexprooch, 14 in een aat tas mëyer wuste tas Tee woo Yeesus uf keruuft hot, tuut aach uns mit Yeesus uf ruufe, un tuut uns mit aych foer xtële. 15 Wayl, tas ales is weeche aych, tas ti unfertiint kuutheet imer kreeser wërt, wayl imer mee layt tuun tsayche tas tii petanklich fer Kot sayn hërlichkheet sin. 16 Tes weeche tuun mer net uf kepe; opwool te mënx woo mer auswënich sin, ferkeet, sicher tuut te mënx woo mer inwënich sin yeete taach nay kepe. 17 Wayl, opwool ti xwiirichkheet khorts tsayt halt un laycht is, tuut fer uns een hërlichkheet pringe woo wunerlich kroos is, een hërlichkheet woo fer imer playpt, 18 soo lang wii mer unser aue hale, net aan te tinge woo mer siin khene, awer aan te tinge woo mer net siin khene. Wayl ti tinge woo mer siin khene, hale khorts tsayt, awer ti tinge woo mer net siin khene, plaype fer imer.