Teuteronoomyum

2 Mayn inlërnung tuut wii te reen fale; Mayn wërter khome wii te tau, Wii suutel uf tas kraas Un wii xtarke reene uf ti plantse. 3 Wayl ich tuun te naame fon Yeehoowa aus xpreche. Xprecht iwer ti hërlichkheet fon unser Kot! 4 Te Fels — perfekt is ales was eyer macht, wayl ale sayn weeche kerecht sin. Kot woo troy is, woo nii unkerecht is; kerecht un ufrichtich is tee. 5 Tas sin tii woo xlechtes ketuun hon. Tii sin net sayn khiner, tas is iire feeler. Tii sin een xlecht un fertreet xeneratsyoon. 7 Tuu aan te friirixe tsayte traan tenke; Tuu aan te yoore fon te ferkangne xeneratsyoone tenke. Froo fer tayn papa, un tee tuut tich fertseele; Froo fer tayn elteste, un tii tuun tich aus leye. 11 Soo wii te aatler tas nest uf hetst, fliit iwer ti yunge un xtrekt ti fliter aus fer tëne hoole, fer tëne uf sayn feetere traan, 12 ploos Yeehoowa hot tëm kefiirt; kheen frëmte kot waar mit tëm keweest. 28 Wayl Israël is een folk oone ferxtant, un feelt ferxtëntnis fer tëne. 29 Es weyer kuut tas se kluuch wëre! Tii teete too triwer noo tenke. Tii teete tenke aan was mit tëne pasiire teet. 31 (Wayl tëne sayn fels is net wii unser Fels; Soo kaar unser faynte erkhëne tas.) 36 Yeehoowa tuut sayn folek richte un tuut mitlayt fon sayn tiiner hon, wën eyer siit tas tëne sayn kraft xwach kep is un tas ploos te xwacher un tee woo nimant hot iwrich keplip is. 37 Tan tuut eyer saan: ‘Woo sin tëne sayn keeter, te fels woo se xuts kesuucht hon, 38 woo kes hon tas fet fon tëne sayn opfere un ketrunk hon te wayn fon tëne sayn ketrenk opfer? Tas tii sich uf xtele un aych helfe khome. Tas tii ayre xuts plats wëre. 39 Mërk tan tas ich, yaa, ich sin Kot, un tas khee anere keeter kept, ploos ich. Ich tuun um pringe un kepe tas leepe. Ich mache wee un ich heele, un es kept nimant woo khan yemant fray mache fon mayn hënt. 40 Wayl ich heepe mayn hant tsum himel un ferxpreche, am saan: “Soo sicher wii ich fer imer leepe”, 41 wën ich mayn xaynich xwaart xarf mache un mayn hënt fërtich lose fer richte, ich pringe winkans iwich mayn faynte un tuun tsurik petsaale fer tii woo mich hase. 42 Ich thunke mayn fletxe im pluut in un mayn xwaart frest flayx: tas pluut fon tii woo um keprung kep sin un fon tii woo in kexpërt kep sin, ti khëp fon tëm faynt sayn xëfe.’ 43 Frayt aych, natsyoone, mit tëm Sayn folek, wayl tee pringt winkans fon tas pluut fon sayn tiiner, pringt winkans iwer sayn faynte un tekt ti sinte fon tas lant fon sayn folek.” 44 Soo, is Mooses khom un hot ti kanse wërter fon tiise liit aus kexproch foer tas folek, tee un Oseyas, soon fon Num. 45 Noo Mooses tiise kanse wërter fer tas kanse Israël saan, 46 tee hot kesaat: “Tenk triwer noo iwer ti kanse wërter fon tiise aanreet woo ich hayt aych kepe, tas teyer khent fer ayre khiner xike ti kanse wërter fon tiise Kesets in hale. 47 Wayl tii sin khee leyere wërter fer aych, awer tii petayte leepe fer aych, un torich tiise wërter khent iir leepe torich fiil tsayt in tas lant woo teyer pewoone tuut wën teyer te Yortan torich keet.” 48 Yeehoowa hot fer Mooses in tëm selwiche taach kesaat: 49 “Kee ruf uf te përich in te rechyoon fon Aparin, te përich Nepo, woo playpt in tas lant fon Moaap, foer Yerikoo, un sii tas lant fon Kanaan, woo ich wii aychentum fer ti israeliiter kepe. 50 Un tuu tuust xtërpe ufm përich woos tuu ruf keest un wërst fersamelt mit tayn foerfatere soo wii Aron, tayn pruuter, kextorep is im përich Hor un mit sayn folek fersamelt kep is, 51 wayl teyer tswaay waart untroy tsu mich tswixich ti israeliiter, aan tas waser fon Meripaa in Kates, im tesërt fon Tsim, wayl teyer hot net mich ferhaylicht foer tas folek fon Israël. 52 Tuu siist tas lant fon wayt, awer keest net rin in tas lant woo ich fer Israël kepe.”