Romaaner
13 Yets xpreche ich mit aych, woo fon te natsyoone sayt. Wayl ich aphostel fer ti natsyoone sin, kepe ich kroos weyert fer mayn tiinst 16 Ale tëm, wën tas ëyerste teel fom taaych haylich is, is te kans taaych haylich; un wën ti wortsel haylich is, sin ti nëst aach haylich. 17 Awer, wën ëtliche nëst ap keproch këp sin, un tuu, opwool ploos een wilt oliiwe paam pist, waarst tuu tswixich tëne kephost këp, un pist mitkliiter fon tëm raychtum fon te oliiwe wortsel këp, 18 tuu nët hoochnaasich mit te nëst sin. Awer, wëns tuu hoochnaasich mit tëne pist, erinert tich tas es is nët tuu woo ti wortsël xtits, awer is ti wortsël woo tich xtitse tuut. 19 Tuu saast tan: “Ëtliche nëst sin ap keproch këp tas ich kephost wëre teet.” 20 Aarich kuut! Tii sin ap keproch wayl se khee klaape hate, awer tuu pist torich te klaape xteen keplip. Tuu nët hoochnaasich sin, awer tuu tiif respëkt hon. 21 Wayl, wën Kot ti natuer nëst nët fertsayt hot, tuut ëyer tich aach nët fertsaye. 22 Tënk mool tan wii Kot kuut un xtrëng is. Ëyer is xtrëng mit tëne woo um kefal sin, awer mit tich, wërt Kot kuut sin, wëns tuu wayter in tëm sayn kuutheet playpst; wën nët, tuust tuu aach ap keproch wëre. 23 Un tii wëre aach kephost këpe, wën se noo lose persoone oone klaape se sin, wayl Kot khan tii noch mool phoste. 24 Wayl, wëns tuu fon tëm natuur wilt oliiwe paam ap kexnit këp pist, un waarst kephost in een oliiwe paam woo keplantst këp is, woo keeche ti natuur is, wii fiil mee wëre ti natuur nëst noch mool in sayn aychne oliiwe paam kephost sin! 25 Wayl ich wilt nët, priiter, tas tëyer tiise hayliche kehaymnis nët khëne tuut, tas tëyer nët kluuch foer sayn aychne aue wërt: een teel fon Israel hot sich niks traus kemacht pis ti tsayt woo te kans numer fon layt fon te natsioone rin khome teete, 26 un soo, wërt te kans Israel keret kepe. Soo wiis kexrip is: “Te reter tuut fon Syoon raus khome un tuu fon Yaakop ti xlëchte tings wëch hale. 33 Wii tiif is Kot sayn raychtum, kluucheet un khëntnis! Sayn kerichte khene net ferxtan wëre, un sayn weeche khene net unersuucht wëre! 34 Wayl, “weer khan Yeehoowa sayn ketanke khëne, orer weer khan tëm aanreete kepe”? 35 Orer, “weer hot tëm eyerst etwas kep, in te aat tas eyer solt tas tëm tsurik kepe”? 36 Wayl ale tinge sin fon tëm, un torich tëm, un fer tëm. Tee fertiint ti hërlichkheet fer imer. Amen.