Ëfeser
5 Soo, macht Kot noo, wii keliipte khiner, 2 un tuut wayter in liip keen, soo wii aach te Kristus uns keliipt hot un sich fer uns ap kep hot, wii een opfer, woo een kuute keroch fer Kot is. 3 Soo wii hayliche layt, solt teyer net fertseele iwer seksuaal imoraaliteet, kwalkee sort unraynheet orer kiirichkheet. 4 Teyer solt aach net aych xeemlich aan xtele, tume kexpreeche hon orer trekiche witse fertseele — tinge woo ferkheert sin. Xtats tas, tankt Kot. 5 Wayl teyer tuut tas wise un erkhëne: nimant woo seksuaal imoraaliteet pratikiirt, woo net phuer is, woo imer mee wil — woo itolatrii petayt — tuut kwalkee ërpxaft kriin aan tëm Raych fon Kristus un fon Kot. 6 Nimant sol aych hinerkeen mit leyere wërter, wayl weeche tiise tinge khomt Kot sayn wuut iwer ti unfoliche mënxe. 7 Tes weeche, teyer solt niks mit tëne se tuun hon; 8 wayl friier, waart teyer tunkelheet, awer yets sayt teyer licht in eenichkheet mim Hër. Tuut wayter leepe wii khiner fom licht, 9 wayl ti frucht fom licht is fon ale sorte kuutheet, kerechtichkheet un woerheet kemacht. 10 Sayt imer sicher iwer was tëm Hër kefalt 11 un lost noo teel mache in te unutsliche aarwayte fon te tunkelheet; xtats tas, pringt se foer. 15 Soo, tuut aych uf phase fer net wii tume sin, awer wii kluuche; 16 un penutst ayre tsayt in te pest aat wiis meechlich is, wayl ti taache sin xlecht. 17 Tes weeche, lost noo unferninftich sin, awer ferxteet was Yeehoowa sayn wile is. 18 Un macht aych net pesof mit wayn, woo macht tas yemant sich oone xaam aan xtelt, awer lost aych fol mit kayst wëre. 19 Ferxtërkt aych naner mit psalme, loope tsu Kot un kaystliche liiter. Singt un macht musik fer Yeehoowa mit kanse hërts 20 un tankt imer unser Kot un Fater, im naame fon unser Hër Yeesus Kristus. 22 Ti fraa sol sich uner te autoriteet fon sayn man xtele soo wii tsum Hër, 23 wayl te man is te khop fon te fraa soo wii Kristus te khop fon te kemaynt un reter fom khërper is. 24 Soo wii ti kemaynt is uner Kristus sayn autoriteet, soo sol ti fraa sich unich te autoriteet fon sayn man xtele, in ales. 25 Man, tuu tayn fraa wayter liipe soo wii Kristus ti kemaynt keliipt un sich fer tii ap kep hot 26 fer ti kemaynt haylich se mache un tii phuer lose, mim waser paat fom wort, 27 soo tas tee ti kemaynt fer sich sëlepst foer xtële khan, in sayn kanse klans, oone fleke un oone xrumle, mit niks woo eenlich wii tas is, awer haylich un oone feeler. 28 Kraat soo, mise ti mëner sayn fraae liipe wii tëne sayn aychne khërper. Te man woo sayn fraa liipt, tuut sich selepst liipe, 29 wayl khee man hast sayn aychne khërper, awer tuut tëm ese kepe un uf phase, soo wii Kristus es mit te kemaynt macht, 31 “Tes weeche, tuut te man sayn fater un sayn muter lose un tuut sich fest tsu sayn fraa hale, un ti tswaay wëre een flayx.” 33 Tes weeche, yeete eene fon aych sol sayn fraa soo wii sich selepst liipe un ti fraa sol tiife respekt fer sayne man tsayche.