1te Pheeter

4 Wayl Kristus im flayx kelit hot, lost aych fërtich mit te selwich aanxtelung. Wayl te mënx woo im flayx layt, hot sayn sinte im xtich kelos, 2 fer te rëst fon sayn tsayt im flayx, nët mee fer ti winxe fon te mëner, awer fer Kot sayn wile se leepe. 3 Wayl teyer hot xon lang kenuuch ti natsyoone sayn wile kemacht, wii teyer aych aan kextelt hot oone xaam, unferxtëntich, un pesof wëre, ausferxeemte fëste, sauferay un falxe un ferpoote aanpeetung. 4 Tii fine tas xpasich tas teyer net mee mit tëne laaft in te selwich xlecht un ausferxeemt aat; tes weeche, xpreche se xlecht iwer aych. 6 In woerheet, is weeche tas tas ti kuute oter sin aach fer ti toote pekhant kemacht, tas se foer Kot sayn aue leepe tëm noo te kayst, opwool tii foer ti mënxe sayn aue, im flayx kericht sin. 7 Awer tas ën fon ales is ticht. Tes weeche, sayt ferninftich un halt ayre acht iwer was mit kepeete se tuun hot. 8 Iwer ales, tuut tiif liip eene tsu te anere hon, wayl ti liip tuut fiile sinte teke. 9 Tuut eene ti anere kuut pehantele, oone kruumle. 10 Tëm noo tas kexenk woo yeete eene kriit hot, tuut tëm penutse fer eene te anere tiine, wii kuute aankexteltner fon Kot sayn unfertiint kuutheet, woo is torich unerxiitliche aate ketsaycht. 11 Wën yemant xprecht, mach tas wii yemant woo Kot sayn ausxprechunge xprecht. Wën yemant ti anere tiint, mach tas mit te kraft woo Kot xenkt, tas Kot in ale tinge ferhërlicht wërt torich Yeesus Kristus. Ti hërlichkheet un ti macht keheere tëm fer ti kans eewiichkheet. Aamen. 12 Keliipte priiter, ferxrekt aych net mit te xrooe proope woo teyer am mit mache sayt, wii wën etwas xpasiches mit aych am pasiire weyer. 13 Kans anerste, tuut aych wayter fraye wën teyer layt soo wii Kristus keliit hot. Tan, khent teyer aych aach fraye un fol frooheet wëre wën sayn hërlichkheet taytlich ketsaycht wërt. 14 Wën teyer kexënt sayt weeche Kristus sayn naame, wërt teyer froo, wayl te kayst fon hërlichkheet, yaa, Kot sayn kayst, is iwer aych am ruue. 15 Awer, nimant fon aych sol layte wayl eyer um pringt, xtelt, tas xlechtes macht orer wayl eyer xnepich in te anere sayn sache is. 16 Awer wën yemant layt wayl eyer een krist is, sol eyer sich net xeeme; xtats tas, tas eyer wayter eer tsu Kot pringt soo lang wii eyer tiise naame nëmt.