Matheus
3 In tiise taache, hot Yoohan te Taafer aan kefang im tesërt fon Yuteea preetiche. 2 Tee hot kesaat: “Peroyt aych, wayl tas himlixe Raych ticht is.” 3 Es waar iwer Yoohan woo te profeet Isayas am xpreche waar mit te wërter: “Yemant ruuft im tesërt: ‘Perayt een weech fer Yeehoowa foer! Lost ti weeche richt.’ ” 4 Yoohan hot sich mit een kamel phels un een leter kërtel aan ketsoo. Tee hot hayxreke un wilte honich kes. 5 Ti layt fon Yeruusalem, fon kans Yuteea un fon te kans rechyoon fon Yortan flus sin tsu tëm kang. 6 Yoohan hot se im Yortan flus ketaaft un tii hon sayn sinte foer ti anere pekhant kemacht. 7 Fiile fariseer un satuseer sin tsum plats khom woo Yoohan ti layt am taafe waar. Wii eyer se kesiin hot, hot eyer kesaat: “Teyer kiftiche xlange! Weer hot kesaat tas teyer aus rayse khent fon Kot sayn wuut, woo klaych khomt? 8 Soo tsaycht torich ayre aktsyoone tas teyer aych peroyt hot. 9 Tuut aych net selepst hinerkeen am tenke: ‘Apraham is unser fater.’ Wayl ich saan aych tas, aus tiise xteen, khan Kot khiner fer Apraham foer pringe. 10 Ti aks is xon fërtich fer ti peem aan te wortsle ap hake. Yeete paam woo net kuute friichte kept, wërt um kemacht un im fayer kexmis. 11 Ich taafe aych mit waser, wayl teyer aych peroyt hot, awer es khomt tee woo xtërker wii ich is; noch net mool sayn santaalye fertiine ich aus tuun. Tee tuut aych mit hayliche kayst un fayer taafe. 12 Eyer halt in te hant ti xip fer tas xtroo un te wayts aus naner mache. Tee tuut sayn trexpootem kans sauwer mache. Tee xtelt te wayts in sayn xope, awer eyer ferprënt tas xtroo in een fayer woo net aus kemacht wëre khan.” 13 Yeesus is tan fon Kalileya pis tëm Yortan flus kang fer sich fon Yoohan taafe lose. 14 Awer Yoohan wolt tëm tsurik hale. Tee hot kesaat: “Warom khomst tuu tsu mich? Tuu must mich taafe.” 15 Yeesus hot keantwort: “Los tas es soo wërt, wayl soo tuun mer Kot sayn wile erfiile.” Tan hot Yoohan noo kelos tëm tsurik hale. 16 Noom taaf, is Yeesus klaych ausm waser kang. In tiise xtun, is te himel uf kang un tee hot Kot sayn kayst kesiin wii een taup uf tëm runer khome. 17 Een xtim is aach fom himel aus khom un hot kesaat: “Tas is mayn liipe Soon. Tee kefalt mich.”