Yoohan

2 Tee tuut yeete estche, woo aan mich is un woo khee friichte kept, ap xnayte, un macht yeete estche, woo friichte kept, sauwer, tas es mee friichte kept. 8 Tas loopt mayne Fater: tas teyer wayter fiil frucht kept un tsaycht tas teyer mayn tisipele sayt. 9 Soo wii te Fater mich liipt, liipe ich aych; playpt in mayne liip. 10 Wën teyer mayn kepoote aan heert, playpt teyer in mayn liip, soo wii ich te Fater sayn kepoote aan heere un plaype in sayn liip. 11 Ich hon tiise tinge fer aych kesaat tas teyer ti selwich frayt wii ich xpiire tuut, un tas teyer fol mit tiise frayt wërt. 12 Tas too is mayn kepoot: liipt eene te anere, soo wii ich aych keliipt hon. 13 Nimant hot kreeser liip wii tee woo sayn leepe fer sayn fraaynte kept. 14 Teyer sayt mayn fraaynte wën teyer macht was ich aych xike. 15 Ich tuun aych wii fraaynte nëne, wayl ich fer aych pekhant kemacht hon ales was ich fon mayn Fater keheert hon. 17 “Ich xike aych tas ales, tas teyer aych naner liipt. 18 Wën ti welt aych hast, wist teyer xon tas se mich foer heyer kehast hot. 19 Wën teyer teel fon te welt weyert, teet ti welt aych liipe, wayl teyer tsu tii keheert hët. Awer, wayl teyer khee teel fon te welt sayt, un ich aych fon te welt raus kesuucht hon, tes weeche tuut ti welt aych hase. 20 Erinert aych was ich aych kesaat hon: te sklaaw is net kreeser wii sayne hër. Wën se mich keyacht hon, tuun se aych aach yachte; wën se mayne wërter aan keheert hon, tuun se ayre wërter aach aan heere. 21 Awer tii tuun tas ales keeche aych mache weeche mayn naame, wayl se khëne net Tee woo mich kexikt hot. 24 Wën ich net tswixich tëne tinge kemacht hët woo noch nimant kemacht hot, tan weyere se oone sint; awer yets, hon se mich kesiin un hon mich un mayne Fater kehast. 25 Awer tas is pasiirt tas ti wërter woo in tëne sayn Kesets xteen sich erfiile teete: ‘Tii hon mich oone uersach kehast.’